Read Iban Jop 7 Bible Online

Jop 7 - Iban bible

Jop 7

¹Pengidup mensia endang baka pengidup soldadu, Baka pengidup orang ke dipejalka ngereja pengawa ti berat,

²Baka ulun ke bisi ati deka belelak ba endur ti lindung, Baka orang gaji ke nganti diri terima gaji.

³Tiap bulan aku nadai kebuah idup. Tiap malam aku semina nemu pemerinsa.

⁴Lebuh aku gali deka tinduk, jam asai ti panjai. Aku gali kasak-kasak semalam-malam nganti hari tawas.

⁵Tubuh aku penuh laban ulat. Tubuh aku dibalut kerutup.[13] Nanah nyau melilih pansut ari rumbak aku.

⁶Aku mansang tuai-setuai, nadai pengadang agi, Laju agi ari ripang ti dikena orang betenun.

⁷Ingat, O Allah Taala, pengidup aku semina kesuh seput aja. Pengelantang ati aku nyau udah abis.

⁸Diatu Nuan meda aku, tang jemah ila Nuan nadai agi meda aku. Enti Nuan ngiga aku, aku nadai agi.

⁹ Kami mensia mati, lalu enda pulai agi, Baka mua hari ti majak ayas-seayas lalu lesap. Semua orang ke udah bekelala enggau kami, nadai agi ingatka kami.

¹¹Aku enda ulih nagang diri bejaku! Aku ringat sereta pedis ati. Aku enda tau enda bejaku.

¹²Nama kebuah Nuan ngasuh aku dijaga orang? Kati Nuan ngumbai aku naga tasik?[14]

¹³Aku gali nguji belelak, Ngarapka diri badu agi pedis.

¹⁴Tang Nuan ngemba aku ngena mimpi. Nuan ngasuh aku begenera sereta ngigau,

¹⁵Datai ke aku nyau minta diri dichekal lalu mati Ari ke idup dalam tubuh ti merinsa tu.

¹⁶Aku enggai agi idup. Aku nyau lelak idup. Awakka aku diau kediri. Pengidup aku nadai reti agi.

¹⁷ Nama kebuah mensia beguna ba Nuan? Nama kebuah Nuan ibuhka utai ti dikereja sida?

¹⁸Nuan meresa sida tiap pagi Lalu nguji sida tiap minit.

¹⁹Kati Nuan enggai malik kebukai enda lama Chukup peluang alai aku nelan liur?

²⁰Kati dosa aku bisi ngemediska Nuan ke ngejil aku? Nama kebuah Nuan belatih nimbakka laja ngagai aku? Kati aku kelalu ngenusahka Nuan?

²¹Kati Nuan enda ulih ngampun dosa aku? Kati Nuan enda ulih ngampun penyalah aku? Enda lama da agi aku deka diau dalam kubur Lalu lebuh Nuan ngiga aku, Nuan enda tetemuka aku.