Read Iban Jop 9 Bible Online

Jop 9 - Iban bible

Jop 9

¹ Sigi amat. Aku bisi udah ninga semua utai nya suba. Tang baka ni ku mensia tau menang bechara ngelaban Allah Taala?

³Kati mensia ulih bekelikuh enggau Iya? Iya tau nanyaka seribu macham tanya Ti enda ulih disaut.[15]

⁴Allah Taala endang bepenemu-dalam sereta besai kuasa. Nadai orang tan ngelaban Iya.

⁵Iya enda madahka Diri lebuh Iya nginsitka bukit Lalu ngeruntuhka sida lebuh Iya ringat.

⁶Allah Taala ngasuh tanah berenyang, lalu ngasuh tanah belinggang. Iya nguyat tiang ti nungkat dunya.

⁷ Iya ulih nagang mata hari tumbuh, Ulih nagang bintang manchar lebuh malam hari.

⁸Nadai orang nulung Allah Taala mintarka langit Tauka ngelunjak belakang naga tasik.[16]

⁹ Allah Taala ngantung Bintang Tiga di langit, Bintang Banyak, Bintang Tujuh, enggau Bintang Selatan.

¹⁰Kitai enda meretika utai ti dikereja Iya, Lalu kereja ajih Iya endang enda nemu abis.

¹¹Allah Taala mansa, tang aku enda ulih meda Iya.

¹²Iya ngambi utai ti dikedekaka Iya, lalu nadai orang ulih nagang Iya. Nadai orang berani nanya Iya, “Nama utai ti dikereja Nuan?”

¹³Pengeringat Allah Taala endang enda berubah. Iya ngalahka bala munsuh Ke udah nulung Rahap,[17] iya nya naga tasik ti ngelaban Iya.

¹⁴Nya alai, nama leka jaku kena aku nyaut Allah Taala?

¹⁵Taja pen aku nadai penyalah, aku semina ulih Minta kasih ari Allah Taala ti Hakim aku.

¹⁶Tang taja pia, enti sema Iya ngasuh aku bejaku, Enda meh aku arapka Iya deka mendingka aku.

¹⁷Iya ngasuh kabut mangka lalu ngerajaika tubuh aku Enggau nadai kebuah.

¹⁸Iya nadai meri awak alai aku nyintak seput. Iya udah ngasuh aku balat pedis ati.

¹⁹Enti utai tu pasal belaban ngena pengering, Iya endang kering. Enti utai tu pasal atur ti lurus, sapa ulih ngasuh Iya mansang ngagai kot?

²⁰Taja pen aku nadai penyalah sereta tetap ati, tang jaku aku munyi ti madahka aku bisi penyalah, Lalu semua utai ti disebut aku, besalah aku magang.

²¹Aku endang nadai penyalah, tang aku enggai ibuhka nya agi. Aku nyau leju idup. Semua utai nyau nadai guna agi. Nemuka kitai bepenyalah, tauka nadai penyalah, Allah Taala sigi deka ngerusak kitai.

²³Lebuh orang ke nadai penyalah mati ngenyit, Allah Taala ketawa.

²⁴Allah Taala nyerahka dunya tu ngagai orang ke jai. Iya ngasuh semua hakim buta. Lalu enti Allah Taala nadai udah ngereja nya, sapa deh?

²⁵Aku jampat belinsur tuai, tang sehari pen nadai ga aku kala lantang.

²⁶Penyampat aku belinsur tuai, baka perau ti pemadu laju, Ngelaju menaul ti nyambarka tikus.

²⁷Enti aku tuchum lalu nguji ngelimpangka diri ari pemedis aku, Semua pemerinsa aku datai baru lalu ngachau aku. Aku nemu Allah Taala endang ngumbai aku udah ngereja penyalah.

²⁹Laban aku dikumbai udah ngereja penyalah, kapa aku deka ibuhka nya?

³⁰Nadai sabun ulih muai dosa aku.

³¹Allah Taala muai aku ngagai lubang ti penuh laban utai ti kamah, Datai ke gari aku nyau malu ke aku.

³²Enti sema Allah Taala nya mensia, aku ulih nyaut Iya. Kami duai tau mutuska laya dalam kot.

³³Tang nadai orang ulih ngatur kami duai, Nadai orang ulih ngakim Allah Taala enggau aku.

³⁴Badu agi ngukum aku, O Allah Taala! Anang agi ngemba aku!

³⁵Aku enda takut. Aku endang deka bejaku Laban aku nemu runding ati diri.