Read Iban Masmur 101 Bible Online

Masmur 101 - Iban bible

Masmur 101

¹[177] Lagu aku ngenang pasal penaluk enggau atur ti lurus, lalu aku nyanyi nya ke Nuan, O TUHAN.

²Aku nadai jai ulah. Kemaya Nuan deka datai ngagai aku? Aku deka idup tuchi dalam rumah aku

³lalu aku enggai meda penyai. Aku begedika utai ti dikereja orang ke ninggalka Allah Taala. Aku enggai bekaul enggau sida.

⁴Aku enggai enda betul ati[178] lalu aku enggai bekaul enggau penyai.[179]

⁵Aku deka muru sebarang orang ke betelai bejaku jai pasal orang bukai. Aku enggai meda orang ti sumbung enggau ti tinggi ati.

⁶Aku deka rinduka orang ke tetap ati ngagai Allah Taala lalu deka ngemendarka sida diau dalam istana aku. Orang ke endang amat betul ati deka dikemendarka bekereja ke aku.

⁷Orang ke bula enda tau diau dalam istana aku. Orang ke pura-pura ngapa enda tau diau di mua aku.

⁸Tiap hari aku deka ngerusak orang ke jai di menua kitai. Aku deka muai semua orang ke jai ari nengeri TUHAN.