Read Iban Masmur 102 Bible Online

Masmur 102 - Iban bible

Masmur 102

¹[180] Pendingka sampi aku, O TUHAN, lalu dingaka sabak aku ke minta tulung!

²Lebuh aku dituntung penusah, anang ninggalka aku! Pendingka aku, lalu saut aku enggau jampat, lebuh aku ngangau!

³Aku mati lalu lesap baka asap. Tubuh aku angat asai api.

⁴Aku layu baka rumput ti rangkai. Aku nadai agi tetengukka pemakai.

⁵Aku bedemuh inggar. Aku semina tinggal kulit enggau tulang.

⁶Aku nyau baka burung ti di menua puang, baka burung puk ti diau ba tembawai.

⁷Aku gali tang enda ulih tinduk. Aku baka burung ti seilu-ilu ba perabung rumah.

⁸Bala munsuh aku mechat aku sepemanjai hari. Sida ke ngeleseka aku, ngena nama aku nyadika jaku sema.

⁹Ketegal pengeringat enggau pemedis ati Nuan, aku makai amau, lalu ai mata aku nyau bechampur enggau ai irup aku. Nuan nyengkau aku lalu nikauka aku.

¹¹Pengidup aku nyau baka ayuk ti nyadi lebuh lemai hari. Aku tu nyau baka rumput ti rangkai.

¹²Tang Nuan, O TUHAN, endang Raja belama iya. Semua turun-menurun deka ingatka Nuan.

¹³Nuan deka angkat lalu sinuka Sion. Maya udah datai alai Nuan patut kasihka iya. Tu meh maya ti ngena.

¹⁴Bala nembiak Nuan rinduka iya, taja pen iya udah rusak. Sida sinu ati ke iya, taja pen iya nyau nyadi tembawai.

¹⁵Semua bansa deka nangika TUHAN. Semua raja di dunya deka nangika kuasa Iya.

¹⁶Lebuh TUHAN ngaga Sion baru, Iya deka mandangka pemesai kuasa Iya.

¹⁷Iya deka ningaka bala nembiak Iya ti udah ditinggalka Iya, lalu mendingka sampi sida.

¹⁸Tuliska utai ti udah dikereja TUHAN ke rebak ti dudi, ngambika orang ke apin ada diatu, deka muji Iya.

¹⁹TUHAN nilik ke baruh ari endur Iya ti kudus ba endur ti tinggi, Iya nilik ke baruh ari serega ngagai dunya.

²⁰Iya ninga demuh orang jil lalu ngelepaska orang ke kena ukum bunuh.

²¹Nya alai nama Iya deka disebut di Sion, lalu Iya deka dipuji di Jerusalem

²²lebuh semua bansa enggau perintah begempuru lalu nyembah TUHAN.

²³TUHAN udah ngasuh aku lemi lebuh aku agi biak. Iya udah ngasuh umur aku pandak.

²⁴O Allah Taala, anang ngambi aku diatu sebedau aku tuai umur. O TUHAN, Nuan idup belama iya.

²⁵ Dulu kelia Nuan ngaga dunya, lalu Nuan ngaga langit ngena jari Nuan.

²⁶Sida deka lesap, tang Nuan deka meruan belama iya. Sida deka luya baka kain. Nuan deka muai sida baka kain, lalu sida deka lesap.

²⁷Tang Nuan endang meruan enda berubah belama iya lalu umur Nuan enda nemu abis.

²⁸Bala anak kami deka diau likun, lalu ari jaga Nuan peturun sida deka diau likun.