Read Iban Masmur 103 Bible Online

Masmur 103 - Iban bible

Masmur 103

¹[181] Puji meh TUHAN, O semengat aku! Semua semengat, roh enggau tubuh aku, puji meh nama Iya ti kudus!

²Semengat aku, puji meh TUHAN, lalu anang enda ingatka penelap Iya.

³Iya ngampun semua dosa aku lalu ngeraika semua penyakit aku.

⁴Iya ngelepaska aku ari kubur lalu merekatka aku ngena pengerindu enggau pengasih.

⁵Iya ngemuaska ati aku[182] enggau utai ti manah, ngambika aku seruran biak sereta kering baka menaul.

⁶TUHAN ngeringka orang ke kena tekan lebuh Iya ngakim lalu meri sida atur ti lurus.

⁷Iya mandangka pelan Iya ngagai Moses lalu ngasuh orang Israel meda pengawa ti besai ti dikereja Iya.

⁸ TUHAN endang kasih sereta rindu, lubah ringat, sereta penuh laban pengerindu ti meruan belama iya.

⁹Iya enda majak nganu. Iya enda ringat belama iya.

¹⁰Iya enda ngukum kitai nitihka dosa kitai tauka malas kitai nitihka penyai kitai.

¹¹Baka langit ti tinggi ari atas dunya, baka nya meh pemesai pengerindu Iya ke orang ke nangika Iya.

¹²Baka timur ti jauh ari barat, baka nya meh penyauh Iya muai dosa kitai.

¹³Baka apai ke nelap enggau anak diri, baka nya meh TUHAN nelap enggau orang ke nangika Iya.

¹⁴Iya nemu utai ti udah dikena ngaga kitai. Iya ingatka kitai tu endang amau.

¹⁵Ba pasal kitai empu, kitai tu baka rumput. Kitai tumbuh lalu idup baka bungai babas.

¹⁶Udah nya ribut muputka iya, lalu iya nadai agi, nadai agi dipeda orang.

¹⁷Tang pengerindu TUHAN deka meruan belama iya ba orang ke nangika Iya, lalu pengelurus Iya deka meruan ari serak siti ngagai serak siti,

¹⁸orang ke nitihka sempekat TUHAN sereta tetap ati ngasika pesan Iya.

¹⁹TUHAN udah ngengkahka kerusi diraja Iya di serega. Iya endang Raja ari atas semua.

²⁰Puji meh TUHAN, kita melikat ti kering sereta bekuasa, ke ngasika pesan Iya, ke mendingka utai ti disebut Iya.

²¹Puji meh TUHAN, semua kita kuasa ti di serega, kita ke nembiak Iya, ti ngereja peneka Iya!

²²Puji meh TUHAN, semua utai ti idup ti udah digaga Iya di semua endur ti diperintah Iya. Puji meh TUHAN, O semengat aku! Puji meh TUHAN, O semengat aku!