Read Iban Masmur 104 Bible Online

Masmur 104 - Iban bible

Masmur 104

¹O TUHAN Allah Taala aku, naka meh pemesai kuasa Nuan! Nuan ngerasukka mulia raja.

²Nuan nyerayung Diri ngena penampak. Nuan udah mintarka langit baka langkau kain

³lalu ngaga rumah Nuan ba atas ai ti di langit[183] Nuan ngaga mua hari nyadika kerita perang Nuan lalu nepan ba sayap ribut.

⁴ Nuan mai pesan Nuan ngena ribut lalu kilat ti nyelar nyadi ulun Nuan.

⁵Nuan udah ngengkahka dunya tegap ba pugu iya, lalu iya enda dikinsitka.

⁶Nuan udah ngengkahka tasik ba atas pugu dunya baka baju panjai, lalu ai ngelamun bukit.

⁷Lebuh Nuan ngerara ai, sida rari. Sida beterudus rari, lebuh Nuan merakka nyawa Nuan ngagai sida.

⁸Sida rarat nurun bukit ngagai lebak, ngagai endur ti udah disediaka Nuan ke sida.

⁹Nuan udah ngeletak garis ti enda tau dilanggar sida, ngambika sida enda ngelamun semua dunya baru.

¹⁰Nuan ngasuh mata ai mansutka ai ba lebak, lalu sungai rarat ba entara bukit.

¹¹Jelu babas ngirup ai ari sida. Dia meh endur alai keledai kampung ngirup lalu enda agi aus.

¹²Ba kayu ti semak nya, burung ngaga sarang lalu belagu.

¹³Ari langit Nuan ngasuh ai ujan labuh ninggang bukit, lalu dunya penuh laban berekat Nuan.

¹⁴Nuan ngasuh rumput tumbuh ngambika bisi diempa jelu sapi, lalu meri kami utai ngambika bisi ditanam kami, ngambika kami bulih asil ari tanah,

¹⁵enggau wain kena kami ngelantangka diri, minyak kana kena kami ngasuh mua kami beperenching, enggau roti ti meri kami pengering.

¹⁶Kayu sidar di Lebanon ditinggang ujan ti bangat, kayu ti ditanam TUHAN Empu.

¹⁷Dia meh endur alai burung ngaga sarang sida. Burung undan ngaga sarang ba puchuk kayu ru.

¹⁸Kambin babas diau ba bukit ti tinggi, lalu jelu dumbang belalai ba sebelah tingkah.

¹⁹Nuan udah ngaga bulan kena ngelai musin. Mata panas nemu maya diri padam.

²⁰Nuan udah ngaga malam, lalu lebuh hari nyau petang semua jelu babas pansut magang.

²¹Singa ti agi biak negung lebuh sida ngiga pemakai, begigaka pemakai ti diberi Allah Taala.

²²Lebuh mata hari tumbuh, sida pulai baru lalu gali dalam lubang sida.

²³Nya baru mensia nurun gawa lalu majak gawa datai ke lemai.

²⁴TUHAN, Nuan udah ngaga mayuh macham utai! Naka meh pemintar Nuan ngaga semua utai nya! Dunya nyau penuh laban utai ti idup ti digaga Nuan.

²⁵Tasik ti luas sereta besai pen bisi, endur alai utai ti idup diau, ti besai enggau ti mit, ti enda ulih diitung.

²⁶ Kapal belayar ba tasik, lalu jelu ti besai bemain dalam iya, iya nya naga tasik ti udah ditempa Nuan,[184]

²⁷Semua sida ngarapka Nuan meri sida pemakai nitihka musin.

²⁸Nuan meri pemakai ngagai sida, lalu sida makai. Nuan meri sida pemakai, lalu sida kenyang.

²⁹Lebuh Nuan nguing kebukai, sida tusah ati. Lebuh Nuan ngambi seput ti meri pengidup, sida mati lalu pulai nyadi amau baru.

³⁰Tang lebuh Nuan meri sida seput,[185] sida idup. Nuan meri pengidup ti baru ngagai dunya.

³¹Awakka mulia TUHAN meruan belama iya! Awakka TUHAN gaga ati ke utai ti udah digaga Iya!

³²Iya merening ngagai dunya, lalu dunya begetar. Iya negu bukit, lalu bukit berasap.

³³Aku deka belagu ke TUHAN seumur idup. Seagi-agi aku idup, aku deka belagu muji Allah Taala aku.

³⁴Awakka Iya gaga ati ke lagu aku, laban Iya ngasuh ati aku gaga.

³⁵Awakka orang ke bedosa dibuai ari dunya. Awakka orang ke jai abis lengis. Puji meh TUHAN, O semengat aku! Puji meh TUHAN!