Read Iban Masmur 105 Bible Online

Masmur 105 - Iban bible

Masmur 105

¹Beri terima kasih ngagai TUHAN. Padahka pemesai kuasa Iya. Tusui ngagai semua bansa utai ti udah dikereja Iya.

²Belagu muji TUHAN. Tusui pasal utai ti badas ti udah dikereja Iya.

³Gaga ati meh kitai ke enggi Iya. Awakka semua orang ke nyembah Iya rami gaga magang.

⁴Mansang meh kitai ngagai TUHAN minta Iya nulung, lalu sembah Iya berari.

⁵Kita peturun Abraham ke nembiak Iya kita peturun Jakop ti udah dipilih Iya: Kingatka kereja ajih ti udah dikereja Allah Taala enggau ukum ti udah diletak Iya.

⁷TUHAN endang Allah Taala kitai. Pesan Iya endang ke semua dunya.

⁸Iya deka ingatka sempekat Iya belama iya, semaya ti diberi Iya ngagai seribu serak.

⁹ Iya deka ingatka sempekat ti udah digaga Iya enggau Abraham enggau semaya ti digaga Iya enggau Isak.

¹⁰ TUHAN ngaga sempekat enggau Jakop, sempekat ti deka meruan belama iya.

¹¹Ku Iya bejaku, “Aku deka meri menua Kanaan ngagai nuan. Menua nya deka nyadika pesaka nuan.”

¹²Lebuh sida agi mimit tubuh, nadai dipedulika orang, lalu diau nyadi orang kampar,

¹³bejalai segau-segau ari menua siti ngagai menua siti, ari perintah siti ngagai perintah siti,

¹⁴ Iya enggai nejuka orang nekanka sida. Kena Iya nyaga sida, Iya meri jaku tangkan ngagai bala raja:

¹⁵“Anang negu bala nembiak ti udah dipilih Aku. Anang ngemediska bala nabi Aku”

¹⁶ Lebuh TUHAN ngasuh lapar pungkang nyadi di menua nya lalu ngerampas semua pemakai sida,

¹⁷ Iya ngirumka siku orang bejalai dulu ari sida, orang ke benama Josep, ti udah dijual nyadi ulun.

¹⁸ Kaki iya ditanchang ngena rantai, lalu rekung iya dikungkung ngena besi,

¹⁹nyentuk ngagai maya utai ti udah ditujum iya, dikamatka, nyentuk ngagai maya Jaku Allah Taala madahka Josep endang madahka utai ti bendar.

²⁰ Udah nya raja menua Ejip ke merintah mayuh bengkah bansa ngasuh orang ngelepaska iya.

²¹ Iya ngeletak Josep nyadi tuai megai perintah lalu ngasuh iya merintah semua menua nya,

²²bekuasa atas bala pemesai raja lalu diberi kuasa meri atur ngagai bala penyanding penemu raja.

²³ Udah nya Jakop mansang ngagai menua Ejip lalu ngentapka diri di menua nya.

²⁴ TUHAN meri mayuh anak ngagai bala nembiak Iya lalu ngasuh sida kering agi ari bala munsuh sida.

²⁵Iya ngasuh orang Ejip begedika bala nembiak Iya lalu nipu bala nembiak Iya.

²⁶ Udah nya Iya ngirumka nembiak Iya Moses, enggau Aron, ti udah dipilih Iya.

²⁷Sida ngereja kereja ti nyelai enggau kereja ajih Allah Taala di menua Ejip.

²⁸ Allah Taala ngasuh menua Ejip dibalut pemetang, tang orang Ejip ngelaban jaku Iya.[186]

²⁹ Iya ngasuh sungai sida bebali nyadi darah lalu munuh semua ikan.

³⁰ Menua sida penuh laban engkatak. Indah istana raja deh penuh laban engkatak.

³¹ Allah Taala bejaku, lalu lalat enggau kerengit malut semua menua nya.

³² Iya ngasuh ujan batu enggau kilat nyadi di menua nya kena nganti ujan.

³³Iya ngerusak batang anggur enggau kayu ara sida lalu matahka semua kayu.

³⁴ Iya bejaku, lalu bejuta-juta iku buntak datai.

³⁵Bala buntak nya makai semua utai ti tumbuh di menua nya, makai semua utai ti ditanam.

³⁶ Iya munuh anak tuai ti lelaki ari semua ruang bilik orang Ejip.

³⁷ Udah nya Iya nguluka orang Israel pansut. Sida mai pirak enggau emas, lalu semua sida bela bepengerai sereta regas magang.

³⁸Orang Ejip takutka sida lalu gaga ati lebuh sida angkat.

³⁹ Allah Taala ngengkahka siti mua hari atas bala nembiak Iya enggau daun api ti meri sida penampak lebuh malam hari.

⁴⁰ Sida minta, lalu Iya ngirumka burung empitu. Iya meri sida pemakai ari serega kena ngenyangka sida.

⁴¹ Iya malu batu, ai lalu pansut, lalu rarat nengah menua puang baka sungai.

⁴²Iya ingatka semaya Iya ti kudus, ti udah digaga Iya enggau nembiak Iya Abraham.

⁴³Nya alai Iya nguluka bala nembiak Iya pansut, lalu sida belagu sereta manjung gaga ati.

⁴⁴ Iya meri sida menua orang bansa bukai lalu ngasuh sida ngerampas umai orang nya,

⁴⁵ngambika bala nembiak Iya ngasika Adat Iya lalu nitihka semua pesan Iya. Puji TUHAN!