Read Iban Masmur 106 Bible Online

Masmur 106 - Iban bible

Masmur 106

¹ Puji TUHAN! Beri terima kasih ngagai TUHAN, laban Iya endang manah. Pengerindu Iya meruan belama iya.

²Sapa ulih madahka pasal semua pengawa ti besai ti udah dikereja Iya? Sapa ulih muji Iya enggau chukup?

³Beberekat meh orang ke ngasika pesan Iya, ke seruran ngereja utai ti ngena.

⁴Kingatka aku, O TUHAN, lebuh Nuan nulung bala nembiak Nuan. Tulung aku lebuh Nuan ngelepaska sida.

⁵Awakka aku meda pengaya bala nembiak Nuan, lalu sama enggau ngasaika pengelantang bansa Nuan, gaga ati temegah enggau sida ke diempu Nuan.

⁶Kami udah bedosa baka aki ini kami. Kami udah bepenyalah sereta jai.

⁷ Aki ini kami di menua Ejip enda meretika pemadas pengawa Allah Taala. Sida enda ingatka penyuah Iya udah mandangka pengerindu Iya, lalu sida angkat ngelaban Allah Taala ti Pemadu Bekuasa ba tasik.[187]

⁸Tang Iya nyelamatka sida, munyi ti udah disemaya Iya, kena Iya ngayanka pemesai kuasa Iya.

⁹ Iya bejaku ngagai Tasik Mirah, lalu tasik nya rangkai. Iya nguluka bala nembiak Iya meraka nengah tanah ti rangkai.

¹⁰Iya ngelepaska sida ari jari orang ke begedika sida. Iya ngelepaska sida ari kuasa bala munsuh sida.

¹¹Tang ai ngelamun bala munsuh sida. Nadai siku sida agi idup.

¹² Nya baru bala nembiak Iya arapka semaya Iya, lalu belagu muji Iya.

¹³Tang sida jampat enda ingatka utai ti udah dikereja Iya lalu ngereja utai enda nganti jaku lalau ari Iya.

¹⁴ Sida balat tetengukka makai utai lebuh sida di menua puang lalu sida nguji Allah Taala.

¹⁵Nya alai Iya meri sida utai ti dipinta sida, tang Iya mega ngirumka penyakit ti balat ngagai sida.

¹⁶ Menua puang nya meh endur alai sida ke kepapaska Moses seduai Aron, nembiak TUHAN ti kudus.

¹⁷Udah nya tanah merangap lalu nelan Datan lalu ngelamun Abiram enggau sida sebilik.

¹⁸Api nurun ngagai orang ke nitihka sida, lalu nganguska orang ke jai nya.

¹⁹ Sida ngaga siku anak sapi ari emas di Sinai lalu nyembah engkeramba nya.

²⁰Sida besilihka mulia Allah Taala enggau engkeramba jelu ti makai rumput.

²¹Sida enda ingatka Allah Taala ti udah ngelepaska sida ngena pengawa Iya ti besai di menua Ejip.

²²Naka meh pemadas utai ti dikereja Iya dia! Naka meh penyelai utai ti nyadi ba Tasik Mirah!

²³Lebuh Allah Taala madahka Diri deka ngerusak bala nembiak Iya, Moses, ulun ke dipilih Iya bediri nyakal Allah Taala lalu nagang pengeringat Iya ngerusak sida.

²⁴ Udah nya sida nulak menua ti manah nya, laban sida enda arapka semaya Allah Taala.

²⁵Sida diau dalam langkau kain lalu mutap, lalu enggai mendingka TUHAN.

²⁶Nya alai Iya lalu nangkan sida enggau jaku madahka Diri deka ngasuh sida mati di menua puang

²⁷ lalu ngachirka peturun sida ba sebelah bansa orang kapir, lalu nejuka sida mati di menua bukai.

²⁸ Udah nya, di Peor bala nembiak Allah Taala lalu enggau orang besembahka Baal lalu makai piring ti udah diberi ngagai petara ti ukai petara ti idup.

²⁹Sida nyungkak TUHAN ringat ketegal utai ti dikereja sida. Penyakit ti balat lalu nyadi ba bala sida.

³⁰Tang Pinehas angkat lalu ngukum orang ke udah salah, lalu penyakit nya enda agi ngerampit.

³¹Lalu ketegal nya Iya dikumbai lurus ari serak siti ngagai serak siti belama iya.

³² Ba mata ai di Meribah, orang mayuh nyungkak TUHAN ringat, lalu ngenusahka Moses.

³³Sida nyungkak Moses balat amat ringat datai ke nyau bejaku enda berunding.

³⁴ Sida enda ngasika jaku TUHAN ti ngasuh sida munuh orang kapir,

³⁵tang jadi enggau orang bansa bukai lalu idup nitihka jalai orang kapir.

³⁶Bala nembiak Allah Taala nyembah engkeramba, lalu tu ngujungka sida dirusak.

³⁷ Sida nyerahka anak lelaki enggau anak indu sida nyadika piring ngagai engkeramba orang Kanaan.

³⁸ Sida munuh anak mit ti nadai penyalah, lalu ngamahka menua laban sida bebunuhka anak mit nya.

³⁹Sida ngaga diri enda tuchi ketegal utai ti dikereja sida sereta enda tetap ati ngagai Allah Taala.

⁴⁰ Nya alai TUHAN ringat ngagai bala nembiak Iya. Iya nyau kejika sida.

⁴¹Iya nyerahka sida ngagai jari orang kapir, lalu munsuh sida merintah sida.

⁴²Sida ditekanka bala munsuh sida, lalu sida nunduk ngagai munsuh sida.

⁴³TUHAN suah udah ngelepaska bala nembiak Iya, tang sida rindu agi angkat ngelaban Iya lalu dosa sida nambah-menambah.

⁴⁴Tang taja pia, TUHAN ninga sida lebuh sida nyabak, lalu Iya ibuhka penusah sida.

⁴⁵Ketegal sida, Iya ingatka sempekat Iya, lalu ketegal pemesai pengerindu Iya, Iya kasihka sida.

⁴⁶Iya ngasuh semua orang ke nekanka sida sinu ati ke sida.

⁴⁷ Lepaska kami, O TUHAN Allah Taala kami, lalu bai kami pulai ari semua bansa, ngambika kami meri terima kasih lalu muji nama Nuan ti kudus.

⁴⁸Puji meh TUHAN Allah Taala ke disembah orang Israel. Puji meh Iya diatu enggau ke belama iya! Awakka semua orang nyebut, “Amin!” Puji TUHAN!