Read Iban Masmur 107 Bible Online

Masmur 107 - Iban bible

Masmur 107

¹ “Beri terima kasih ngagai TUHAN, laban Iya endang badas. Pengerindu Iya meruan belama iya!”

²Sebut semua leka jaku tu betandu-tandu kena muji TUHAN, semua kita ke udah dilepaska Iya ari penusah kita.

³lalu udah mai kita pulai baru ari menua bukai, ari timur enggau ari barat, ari utara enggau ari selatan.[188]

⁴Sekeda bejalai segau-segau ba sebelah menua puang nadai tetemuka batang jalai ngagai nengeri ti deka alai sida diau.

⁵Sida lapar sereta aus lalu nadai ngadang diri ulih idup.

⁶Udah nya lebuh sida kena laban penusah lalu ngangauka TUHAN, Iya ngelepaska sida ari penusah sida.

⁷Iya nguluka sida nengah jalai ti rurus ngagai nengeri ti deka alai sida diau.

⁸Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida.

⁹Sida ke aus diberi Iya ai lalu sida ke lapar dikenyangka Iya ngena utai ti manah.

¹⁰Sekeda sida diau dalam pemetang, orang jil ke merinsa ditanchang ngena rantai,

¹¹laban sida udah angkat ngelaban pesan Allah Taala ti Pemadu Bekuasa lalu udah nulak ajar Iya.

¹²Sida nyau lembut tulang laban bebendar gawa. Sida rebah, lalu nadai orang nulung.

¹³Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida.

¹⁴Iya mai sida pansut ari pemetang nya lalu mutuska rantai ti nanchang sida.

¹⁵Sida enda tau enda meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida.

¹⁶Iya ngeruntuhka pintu ti digaga ari temaga lalu matahka alang besi.

¹⁷Sekeda sida beli, natka pemerinsa ketegal dosa sida enggau ketegal penyai sida.

¹⁸Sida nyau deka mutah meda pemakai lalu nyau deka mati.

¹⁹Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida.

²⁰Iya ngeraika sida ngena jaku Iya lalu ngelepaska sida ari kubur.

²¹Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida.

²²Awakka sida meri piring terima kasih ngagai Iya, lalu enggau lagu gaga ati, nusui semua utai ti udah dikereja Iya.

²³Sekeda sida belayar ngena kapal ba Tasik Tengah, ngulihka pengidup di tasik.

²⁴Sida meda utai ti ulih dikereja TUHAN, meda kereja badas ti dikereja Iya di tasik.

²⁵Iya bejaku, lalu ribut biaubalai muput lalu ngasuh gelumbang nyadi.

²⁶Kapal terangkat tinggi disaguka gelumbang lalu terensam ke dalam ai; bala kelasi lalu takut ditempuh utai ti baka nya.

²⁷Sida tesangkut sereta guir-guir baka orang ke mabuk, lalu nadai daya agi.

²⁸Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida.

²⁹Iya ngasuh biaubalai teduh lalu gelumbang pen badu agi besegum.

³⁰Sida gaga ati laban biaubalai nyau nadai agi, lalu Iya mai sida enggau likun ngagai pengkalan ti digusung sida.

³¹Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida.

³²Awakka sida ngemesaika Iya lebuh orang mayuh begempuru lalu muji Iya di mua bala tuai.

³³TUHAN udah ngasuh sungai rangkai lalu ngasuh mata ai badu agi mansutka ai.

³⁴ Iya ngasuh tanah ti ami nyadi tanah ti masin sereta kusi ketegal penyai orang ke diau dia.

³⁵Iya ngubah menua puang nyadi letung, lalu tanah ti rangkai nyadi mata ai.

³⁶Iya ngasuh orang ke lapar diau dia, lalu sida ngaga sebuah nengeri alai diau.

³⁷Sida nanam utai ba umai, lalu nanam anggur lalu bulih amat ngetau.

³⁸Iya merekatka bala nembiak Iya, lalu sida mayuh anak, lalu Iya ngasuh jelu sida mayuh anak.

³⁹Lebuh bala nembiak Allah Taala alah, lalu dikemaruhka ketegal sida ditekan sereta diperinsa, lalu tusah ati,

⁴⁰Iya ngeleseka orang ke nekanka sida lalu ngasuh sida bejalai segau-segau ba sebelah menua puang ti nadai meruan batang jalai.

⁴¹Tang Iya ngelepaska orang ke suntuk ari pemerinsa sida lalu ngasuh ruang bilik sida nambah-menambah baka raban jelu bedus.

⁴²Orang ke lurus meda nya, lalu sida gaga ati, tang semua orang ke jai nadai agi bemunyi.

⁴³Awakka orang ke bepenemu-dalam berundingka utai tu. Awakka sida berundingka pengerindu TUHAN ti meruan belama iya.