Read Iban Masmur 108 Bible Online

Masmur 108 - Iban bible

Masmur 108

¹[189] Ati aku endang tetap, O Allah Taala! Ati aku endang amat tetap! Aku deka belagu muji Nuan! Dani meh nuan, O semengat aku!

²Dani meh kita, O belikan enggau engkeratung aku! Aku deka ngerak mata hari.

³Aku deka meri terima kasih ngagai Nuan, O TUHAN, di mua semua bansa. Aku deka muji Nuan di mua semua mensia.

⁴Pengerindu Nuan ti meruan belama iya endang ngelui serega. Penetap ati Nuan nyentuk ke langit.

⁵pandangka pemesai kuasa Nuan di langit, O Allah Taala, enggau mulia Nuan di serata dunya.

⁶Selamatka kami ngena pengering Nuan. Saut meh sampi aku, ngambika orang ke dikerinduka Nuan, dilepaska.

⁷Ku Allah Taala bejaku ari endur Iya ti kudus,[190] “Enggau ati ti gaga, Aku deka magi menua Sekem lalu meri Lebak Sukot ngagai bala nembiak Aku.

⁸Menua Giliat endang enggi Aku. Manasi mega enggi Aku. Epraim nya selapuk kebal Aku lalu Judah nya tungkat diraja Aku.

⁹Tang Aku deka ngena Moap nyadika dulang alai Aku bebasu, lalu Aku deka nikauka kasut Aku ngagai Edom, nyadika tanda Aku bempu menua nya. Aku deka manjung gaga ati menang ngelaban orang Pilistin.”

¹⁰O Allah Taala, sapa deka mai aku ngagai nengeri ti bekuta nya? Sapa deka nguluka aku ngagai Edom?

¹¹Kati Nuan amat udah nulak kami? Kati Nuan enggai bejalai enggau bala soldadu kami?

¹²Tulung meh kami ngelaban munsuh. Tulung ari mensia sigi nadai guna.

¹³Enti Allah Taala setanah enggau kitai, kitai deka menang. Iya deka ngalahka bala munsuh kitai.