Read Iban Masmur 109 Bible Online

Masmur 109 - Iban bible

Masmur 109

¹[191] Aku muji Nuan, O Allah Taala. Anang Nuan enda bemunyi!

²Orang ke jai enggau orang ke bula, nyerang aku. Sida betenahka aku,

³bejaku jai pasal aku, lalu nyerang aku enggau nadai kebuah.

⁴Sida ngelaban aku, taja pen aku rinduka sida lalu udah besampika sida.[192]

⁵Sida malas pemanah aku ngena penyai, lalu malas pengerindu aku ngena pemenchi.

⁶Pilih sekeda hakim ti jai ngelaban iya, lalu awakka siku orang bedawaka iya.

⁷Lebuh iya kena pechara, awakka iya ditemu udah ngereja penyalah, datai ke sampi iya dikumbai dosa!

⁸ Awakka iya pandak umur; awakka orang bukai ngambi pengawa iya!

⁹Awakka bala anak iya nadai apai, lalu bini iya balu!

¹⁰Awakka bala anak iya bejalai segau-segau bepintaka utai; Awakka sida diburu ari[193] tembawai ti alai sida diau!

¹¹Awakka orang ke udah nyali iya utai, ngerampas semua reta tengkira iya; lalu awakka orang kampar ngenchuri semua utai ti udah ulih iya bekereja.

¹²Awakka nadai orang deka nelap enggau iya tauka kasihka bala anak iya ke tinggal nadai apai.

¹³Awakka semua peturun iya mati magang, lalu awakka nama iya enda dikingatka agi ba peturun ti nangkanka iya.

¹⁴Awakka TUHAN ngingatka penyai aki ini iya, lalu awakka dosa indai iya enda diampun.

¹⁵Awakka TUHAN seruran ingatka dosa sida, lalu awakka sida enda dikingatka agi!

¹⁶Laban iya nadai kala berunding siru enggau orang, tang merinsaka orang ke seranta enggau ke suntuk utai lalu merinsaka orang ke tusah datai ke sida mati.

¹⁷Iya rindu nyumpah; awakka iya empu ditinggang sumpah! Iya enggai merekatka orang; awakka iya empu nadai bulih berekat!

¹⁸Iya ngerasukka tebiat nyumpah; awakka sumpah iya tama ke dalam tubuh iya empu baka ai, baka minyak, ti dalam tulang iya!

¹⁹Awakka sumpah nya nyerayung iya baka kain baka belulang ti melit punggung iya!

²⁰Awakka tu nyadika upah ti diberi TUHAN ngagai orang ke bedawaka aku, orang ke bejaku jai ngelaban aku!

²¹Tang Nuan, O Allah Taala ti TUHAN aku, tulung meh aku ketegal nama Nuan; laban pengerindu Nuan ti meruan belama iya endang amat manah, lepaska meh aku tu.

²²Laban aku tu seranta sereta suntuk, lalu ati aku amat tusah.

²³Aku nyau deka lesap baka ayuk lebuh lemai hari. Aku dikebuka baka buntak.

²⁴Patung aku lemi ketegal aku bepasa; lalu tubuh aku nyau kurus.

²⁵ Aku tu diketawaka orang ke bedawaka aku; lebuh sida meda aku sida ngilikka pala.

²⁶Tulung meh aku, O TUHAN Allah Taala aku. Selamatka aku ketegal pengerindu Nuan ti meruan belama iya!

²⁷Asuh bala munsuh aku nemu Nuan udah ngelepaska aku.

²⁸Sida nyangka deka nyumpah aku, tang Nuan deka merekatka aku. Awakka sida malu, lalu awakka aku ke nembiak Nuan, gaga ati.

²⁹Awakka bala orang ke bedawaka aku malu. Awakka sida nyerayung diri ngena pemalu nyadika baju panjai sida.

³⁰Aku deka meri terima kasih ngagai TUHAN enggau nyawa ti inggar. Aku deka muji Iya lebuh orang begempuru bebala mayuh,

³¹laban Iya ngeringka orang ke seranta lalu ngelepaska sida ari orang ke ngeletak sida diukum dibunuh.