Read Iban Masmur 115 Bible Online

Masmur 115 - Iban bible

Masmur 115

¹Ukai kami, O TUHAN, ukai kami, tang Nuan siku aja ke patut dipuji, laban pengerindu enggau penetap ati Nuan endang meruan belama iya!

²Nama kebuah semua bansa nanya, “Dini alai Allah Taala sida?”

³Allah Taala kami di serega. Iya ngereja sebarang utai ti dikedekaka Iya.

⁴ Engkeramba sida digaga ari pirak enggau emas, ditempa jari mensia.

⁵Sida bisi lubang nyawa, tang enda nemu bejaku, bisi mata, tang enda ulih meda.

⁶Sida bisi pending, tang enda ulih ninga, bisi idung, tang enda ulih nyium utai.

⁷Sida bisi jari, tang enda ulih ngama utai, bisi kaki, tang enda ulih bejalai. Sida enda ulih bemunyi.

⁸Awakka semua orang ke nempa sereta manggaika pengarap sida ba engkeramba nya nyadi[197] baka engkeramba ti udah ditempa sida.

⁹Panggaika pengarap kita ba TUHAN, kita orang Israel. Iya nulung sereta nyaga kita.

¹⁰Panggaika pengarap kita ba TUHAN, kita imam Allah Taala. Iya nulung sereta nyaga kita.

¹¹Panggaika pengarap kita ba TUHAN, semua kita ke nangika Iya. Iya nulung sereta nyaga kita.

¹²TUHAN ingatka kitai, lalu deka merekatka kitai. Iya deka merekatka orang Israel enggau semua imam Allah Taala.

¹³ Iya deka merekatka genap iku orang ke nangika Iya, ke besai enggau ke mit.

¹⁴Awakka TUHAN meri mayuh anak ngagai kita enggau ngagai peturun kita!

¹⁵Awakka kita diberekatka TUHAN ti udah ngaga langit enggau dunya!

¹⁶Serega endang enggi TUHAN siku aja, tang Iya meri dunya ngagai kitai mensia.

¹⁷Orang ke mati enda muji TUHAN, lalu orang ke udah nurun ngagai dunya ti sunyi.[198] enda mega muji TUHAN.

¹⁸Tang kitai ke idup, deka muji TUHAN kenyau ari diatu datai ke belama iya. Puji TUHAN!