Read Iban Masmur 116 Bible Online

Masmur 116 - Iban bible

Masmur 116

¹Aku rinduka TUHAN, laban Iya udah ninga aku, enggau sampi aku.

²Laban Iya nyingitka pending Iya ngagai aku nya alai aku deka ngangau seagi aku idup.

³Kuasa pemati bekelingika aku. Penakut aku ke pendam nyau malut aku. Aku takut sereta irau.

⁴Aku lalu ngangauka nama TUHAN, “O TUHAN, aku minta Nuan ngidupka nyawa aku!”

⁵TUHAN kasih sereta badas. Allah Taala kitai endang kasih.

⁶TUHAN nyaga orang ke nadai daya. Lebuh aku dituntung penusah, Iya nyelamatka aku.

⁷Pulai meh nuan, O semengat aku, ngagai endur alai nuan belelak; laban TUHAN udah manah enggau nuan.

⁸Laban TUHAN udah ngelepaska aku ari pemati. nagang ai mata aku pansut nagang aku teterap.

⁹Nya alai aku bejalai di mua TUHAN di dunya orang ke idup.

¹⁰ Aku majak arap, taja pen aku nyebut, “Aku balat kena perinsa.”

¹¹Ati aku iran, lalu aku nyebut, “Nadai siku orang tau dikarapka.”

¹²Nama utai ti tau diberi aku ngagai TUHAN kena malas semua pemanah Iya enggau aku?

¹³Aku deka mai piring wain lalu ngangauka nama TUHAN;

¹⁴Aku deka mayar semaya aku ngagai TUHAN di mua semua bala nembiak Iya.

¹⁵Naka meh penyayau TUHAN ke nembiak Iya ke mati!

¹⁶O TUHAN, aku tu nembiak Nuan; Aku tu nembiak Nuan; anak ulun Nuan. Nuan udah muka tali ti dikena nanchang aku.

¹⁷Aku deka meri ngagai Nuan piring terima kasih lalu ngangauka nama TUHAN.

¹⁸Aku deka mayar semaya aku ngagai TUHAN di mua semua nembiak Iya,

¹⁹dalam kot ti dalam Rumah Sembiang TUHAN, ba tengah-tengah nuan, O Jerusalem. Puji TUHAN!