Read Iban Masmur 118 Bible Online

Masmur 118 - Iban bible

Masmur 118

¹ Beri meh terima kasih ngagai TUHAN, laban Iya endang badas; pengerindu Iya meruan belama iya.

²Awakka orang Israel nyebut, “Pengerindu Iya endang meruan belama iya.”

³Awakka ruang bilik imam Aron nyebut, “Pengerindu Iya endang meruan belama iya.”

⁴Awakka semua orang ke nangika TUHAN nyebut, “Pengerindu Iya endang meruan belama iya.”

⁵Lebuh aku tusah, aku ngangauka TUHAN; TUHAN nyaut aku lalu ngelepaska aku.

⁶ Aku enda takut laban TUHAN bisi ngimbai aku. Nama utai ti ulih dikereja orang ngagai aku?

⁷TUHAN ngimbai aku lalu nulung aku; aku deka menang lalu malik ngagai bala munsuh ke begedika aku.

⁸Manah agi belindung ba TUHAN ari ke manggaika diri ba mensia.

⁹Manah agi belindung ba TUHAN ari ke manggaika diri ba bala tuai mensia.

¹⁰Semua bansa bekelingika aku; tang aku ngerusak sida laban TUHAN nulung aku!

¹¹Sida ngelulung aku; tang aku ngerusak sida laban TUHAN nulung aku!

¹²Sida betatam ngelingi aku baka indu manyi, tang sida angus, ngenyampat babas ti diempa api. Aku ngerusak sida laban TUHAN nulung aku!

¹³Aku balat amat diserang sida lalu aku nyau deka alah tang TUHAN nulung aku.

¹⁴ TUHAN nyadika pengering enggau lagu aku; Iya udah nyelamatka aku.

¹⁵Pendingka bala nembiak Allah Taala manjung gaga ati dalam langkau kain sida laban sida udah menang: “Jari kanan TUHAN ti udah menang!

¹⁶Jari kanan TUHAN ti patut dipuji, Jari kanan TUHAN udah menang!”

¹⁷Aku enda mati, tang deka idup lalu nusui pasal utai ti udah dikereja TUHAN.

¹⁸TUHAN udah balat amat ngukum aku, tang Iya enda nejuka aku mati.

¹⁹Buka meh pintu Rumah Sembiang ke aku, ngambika aku ulih tama nengah pintu nya lalu meri terima kasih ngagai TUHAN!

²⁰Tu pintu TUHAN. Orang ke lurus deka tama nengah pintu nya.

²¹Aku meri terima kasih ngagai Nuan, O TUHAN, laban Nuan udah nyaut aku, lalu nyelamatka aku.

²² Batu ti enda diguna tukang rumah udah nyadi batu ti pemadu beguna.

²³Utai tu udah dikereja TUHAN; Utai nya manah gaya dipeda kitai!

²⁴Tu meh hari ti udah digaga TUHAN; aram kitai rami gaga lalu ngelantangka diri ba hari tu.

²⁵ Lepaska kami, O TUHAN, Lepaska kami! Asuh kami mujur, O TUHAN!

²⁶ Beberekat meh iya ke datai dalam nama TUHAN! Kami muji nuan ari Rumah TUHAN.

²⁷TUHAN endang Allah Taala, lalu Iya udah meri kitai penampak. Bai dan kayu ba jari kita, lalu belabuh begawai bejalai ngelingi alta.

²⁸Nuan endang Allah Taala aku, lalu aku deka meri terima kasih ngagai Nuan. Nuan endang Allah Taala aku, Aku deka ngemesaika Nuan.

²⁹Beri terima kasih ngagai TUHAN, laban Iya endang badas, laban pengerindu Iya endang meruan belama iya.