Read Iban Masmur 119 Bible Online

Masmur 119 - Iban bible

Masmur 119

¹Beberekat meh orang ke nadai ngereja penyalah, ke ngasika adat TUHAN.

²Beberekat meh orang ke nitihka adat TUHAN, ke ngiga Iya enggau pengabis ati sida.

³Sida nadai kala ngereja penyalah, tang nitihka TUHAN.

⁴Nuan, O TUHAN, udah meri ngagai kami adat Nuan lalu udah ngasuh kami tetap ati ngasika adat nya.

⁵Aku ngarapka diri ulih tetap ati nitihka semua atur Nuan!

⁶Nya baru aku enda malu, laban aku meratika semua pesan Nuan.

⁷Aku deka muji Nuan enggau ati ti tuchi, lebuh aku belajarka adat Nuan ti lurus.

⁸Aku deka ngasika adat Nuan. Anang ninggalka aku!

⁹Baka ni ku orang ke biak ulih ngintu pendiau diri tuchi? Ari sida ke ngasika pesan Nuan.

¹⁰Aku deka ngiga Nuan enggau pengabis ati aku; anang nejuka aku limpang ari pesan Nuan.

¹¹Aku udah nyimpan adat Nuan dalam ati aku, ngambika aku enda bedosa ngelaban Nuan.

¹²Aku muji Nuan, O TUHAN. Ajar meh aku jalai Nuan.

¹³Aku deka madahka semua adat ti udah diberi Nuan.

¹⁴Aku gaga ati nitihka adat Nuan, lebih agi ari ke gaga ati ngembuan mayuh reta.

¹⁵Aku belematika atur Nuan, lalu meratika ajar Nuan.

¹⁶Aku gaga ati ke adat Nuan. Aku deka seruran ingatka pesan Nuan.

¹⁷Awakka Nuan meri aku ke nembiak Nuan mayuh utai, ngambika aku ulih idup lalu ngasika ajar Nuan.

¹⁸Buka meh mata aku, ngambika aku ulih meda utai ti badas dalam adat Nuan.

¹⁹Aku enda diau lama di dunya tu; anang ngelalaika pesan Nuan ari aku.

²⁰Ati aku balat lelengau ke atur Nuan berari.

²¹Nuan nganu orang ke sumbung, ke kena sumpah, ke limpang ari pesan Nuan.

²²Buai ari aku jaku pechat enggau jaku kelese sida, laban aku udah ngasika adat Nuan.

²³Taja pen bala raja bepekat ngelaban aku, tang aku deka belematika ajar Nuan.

²⁴Adat Nuan ngasuh ati aku gaga. Adat Nuan nyadika penyanding penemu aku.

²⁵Aku alah lalu garing-garing malai amau. Idupka aku baru, munyi ti udah disemaya Nuan.

²⁶Lebuh aku madahka semua utai ti udah dikereja aku, Nuan udah nyaut aku. Ajar meh aku jalai Nuan.

²⁷Asuh aku meretika adat Nuan, lalu aku deka belematika pengawa Nuan ti badas.

²⁸Aku enda ulih natka ati diri ti tusah. Keringka aku, munyi ti udah disemaya Nuan.

²⁹Kejangka aku jauh ari pendiau ti salah, lalu ulih pengasih Nuan, ajar aku adat Nuan.

³⁰Aku udah mutuska runding deka tetap ati ngagai Nuan. Aku udah mendingka atur Nuan.

³¹Aku bepegai ba adat Nuan, O TUHAN. Anang nejuka orang ngemaluka aku.

³²Aku deka nitihka pesan Nuan lebuh Nuan ngasuh aku lebih agi mereti.

³³Ajar meh aku, O TUHAN, reti adat Nuan, lalu aku deka ngasika adat nya datai ke ujung.

³⁴Asuh aku mereti, ngambika aku ngasika adat Nuan lalu nitihka iya enggau pengabis ati aku.

³⁵Iring aku nitihka pesan Nuan, laban aku rinduka iya.

³⁶Asuh ati aku inginka adat Nuan, ukai inginka pengaya.

³⁷Anang ngasuh mata aku merening ngagai utai ti ngasuh aku sumbung; lalu awakka aku idup nitihka jalai Nuan.

³⁸Kingatka semaya Nuan enggau aku ke nembiak Nuan, semaya ti digaga Nuan enggau orang ke ngasika Nuan.

³⁹Kejangka aku jauh ari jaku anu ti diketakutka aku; laban adat Nuan endang manah.

⁴⁰Aku lelengauka pesan Nuan; laban pengelurus Nuan meri aku pengidup.

⁴¹pandangka pemesai pengerindu Nuan ke aku, O TUHAN, lalu selamatka aku, munyi ti udah disemaya Nuan;

⁴²nya baru aku ulih nyaut orang ke ngeleseka aku laban aku manggaika diri ba jaku Nuan.

⁴³Lalu anang nagang aku nyebut jaku ti bendar, laban aku andal ati ke adat Nuan.

⁴⁴Aku deka seruran ngasika adat Nuan, belama lama iya;

⁴⁵lalu aku deka dilepaska laban aku udah ngiga ajar Nuan.

⁴⁶Aku deka mega bejakuka pasal adat Nuan ngagai bala raja lalu aku enda malu;

⁴⁷laban aku gaga ati ke pesan Nuan ti dikerinduka aku.

⁴⁸Aku bebasaka pesan Nuan ti dikerinduka aku, lalu aku deka belematika ajar Nuan.

⁴⁹Kingatka semaya Nuan enggau aku ke nembiak Nuan, ti ngasuh ati aku andal.

⁵⁰Tu meh utai ti ngenyamaika ati aku lebuh aku natka diri merinsa, iya nya, semaya Nuan deka meri aku pengidup.

⁵¹Orang ke enda nangika Allah Taala ngeleseka aku, tang aku enggai limpang ari adat Nuan.

⁵²Lebuh aku berundingka adat ti diberi Nuan dulu kelia, ati aku lantang, O TUHAN.

⁵³Aku balat pedis ati lebuh aku meda orang ke jai ngelengkaka adat Nuan.

⁵⁴Adat Nuan nyadika lagu aku sekumbang aku ke idup enda lama di dunya tu.

⁵⁵Lebuh malam hari aku ngingatka nama Nuan, O TUHAN, lalu ngasika adat Nuan.

⁵⁶Berekat tu udah datai ba aku, ngambika aku ngasika ajar Nuan.

⁵⁷Semina Nuan siku aja ke dikinginka aku, O TUHAN. Aku besemaya deka ngasika jaku Nuan.

⁵⁸Enggau pengabis ati aku, aku minta Nuan kasihka aku munyi ti udah disemaya Nuan!

⁵⁹Aku udah berundingka pasal perangai aku, lalu aku besemaya deka nitihka adat Nuan.

⁶⁰Aku enda betangguh tang beguai-guai ngasika pesan Nuan.

⁶¹Orang ke jai udah nan panjuk kena nyintak aku, tang aku seruran ingatka adat Nuan.

⁶²Aku dani tengah malam lalu muji Nuan ketegal pengelurus atur Nuan.

⁶³Aku tu pangan semua orang ke nangika Nuan, semua orang ke ngasika adat Nuan.

⁶⁴TUHAN, dunya tu penuh laban pengerindu Nuan ti meruan belama iya. Ajar aku pesan Nuan.

⁶⁵Nuan udah ngamatka semaya Nuan, TUHAN, lalu Nuan udah manah enggau aku ke nembiak Nuan.

⁶⁶Beri aku penemu enggau runding ti tajam laban aku arapka pesan Nuan.

⁶⁷Sebedau Nuan ngukum aku suba, aku suah udah salah, tang diatu aku ngasika jaku Nuan.

⁶⁸Nuan endang badas lalu ngereja utai ti badas; Ajar aku adat Nuan.

⁶⁹Orang ke enda nangika Allah Taala bejaku bula pasal aku, tang aku ngasika atur Nuan enggau pengabis ati aku.

⁷⁰Sida enda mereti, tang aku gaga ati ke adat Nuan.

⁷¹Aku untung natka diri kena perinsa, ngambika aku nemu belajarka adat Nuan.

⁷²Adat ti udah diberi Nuan besai agi reti ba aku ari semua duit emas enggau semua duit pirak di dunya tu.

⁷³Nuan udah ngaga enggau nempa aku; Asuh aku mereti, ngambika aku ulih belajarka adat Nuan.

⁷⁴Orang ke nangika Nuan deka meda aku lalu rami gaga, laban aku andal ati ke semaya Nuan.

⁷⁵Aku nemu atur Nuan endang lurus, O TUHAN, lalu Nuan udah ngukum aku laban Nuan endang tetap ati.

⁷⁶Awakka pengerindu Nuan ti meruan belama iya, merindang ati aku, munyi ti udah disemaya Nuan ngagai aku ke nembiak Nuan.

⁷⁷Kasihka aku, ngambika aku idup laban aku gaga ati ke adat Nuan.

⁷⁸Awakka orang ke enda nangika Allah Taala malu, laban sida udah nguji nipu aku; tang aku deka belematika atur Nuan.

⁷⁹Awakka orang ke nangika Nuan datai ngagai aku, ngambika sida nemu adat Nuan.

⁸⁰Awakka aku bebasaka adat Nuan ngambika aku enda malu.

⁸¹TUHAN, aku nyau lelak nganti Nuan ngelepaska aku. Aku manggaika diri ba jaku Nuan.

⁸²Mata aku nyau lelak nganti utai ti disemaya Nuan, lalu aku nanya, “Kemaya Nuan deka merindang aku?”

⁸³Laban aku tu nadai guna baka kambut wain ti udah dibuai, tang aku nadai kala enda ingatka adat Nuan.

⁸⁴Ni pengelama aku agi nganti? Kemaya Nuan deka ngakim orang ke merinsaka aku?

⁸⁵Orang ke enda nangika Allah Taala, ti enda ngasika adat Nuan, udah numbak lubang kena sida nangkap aku.

⁸⁶Semua pesan Nuan endang tau dikarapka magang. Orang merinsaka aku ngena pemula - tulung aku!

⁸⁷Sida nyau deka ulih munuh aku, tang aku nadai kala ngelengkaka pesan Nuan.

⁸⁸Ulih pengerindu Nuan ti meruan belama iya, anang munuh aku, ngambika aku ulih ngasika adat Nuan.

⁸⁹Jaku Nuan, O TUHAN, deka meruan belama iya. Iya meruan belama iya di serega.

⁹⁰Penetap ati Nuan endang meruan belama iya; Nuan udah ngengkahka dunya ba endur iya, lalu iya enda nginsit.

⁹¹Semua utai mengkang meruan magang nyentuk ngagai sehari tu laban pesan Nuan, laban semua sida nya endang nembiak Nuan magang.

⁹²Enti aku enda udah gaga ati ke adat Nuan, aku tentu udah mati laban pemerinsa aku.

⁹³Aku enggai sekali-kali ngelengkaka atur Nuan, laban Nuan udah ngidupka nyawa aku ngena atur nya.

⁹⁴Aku endang enggi Nuan - selamatka aku; laban aku udah ngiga ajar Nuan.

⁹⁵Orang ke jai ngipa aku, deka munuh aku, tang aku deka belematika adat Nuan.

⁹⁶Aku nemu, semua utai endang bisi sekat magang, tang pesan Nuan amat luas.

⁹⁷Aku rinduka adat Nuan! Aku belematika iya sepemanjai hari.

⁹⁸Pesan Nuan ngasuh aku pintar agi ari bala munsuh aku, laban pesan Nuan endang seruran enggau aku.

⁹⁹Aku mereti agi ke utai ari semua pengajar aku, laban aku belematika ajar Nuan.

¹⁰⁰Aku meretika mayuh agi utai ari sida ke tuai umur, laban aku ngasika ajar Nuan.

¹⁰¹Aku udah nyeliahka semua ulah ti jai, ngambika aku ulih ngasika jaku Nuan.

¹⁰²Aku nadai kala limpang ari adat Nuan laban Nuan Empu udah ngajar aku.

¹⁰³Naka meh pemanis ajar Nuan, manis agi ari ai manyi dalam mulut aku!

¹⁰⁴Aku bulih penemu-dalam ari ajar Nuan, nya alai aku begedika semua perangai ti jai.

¹⁰⁵Leka jaku Nuan nyadika lampu tenggau aku nyadika tenggau jalai aku.

¹⁰⁶Aku udah besumpah lalu udah ngamatka sumpah deka ngasika adat Nuan ti lurus.

¹⁰⁷Aku balat merinsa; beri aku pengidup, O TUHAN, nitihka semaya nuan.

¹⁰⁸Sambut meh sampi puji aku, O TUHAN, lalu ajar aku adat Nuan.

¹⁰⁹Aku berambunka nyawa diri,[199] tang aku nadai kala enda ingatka adat Nuan.

¹¹⁰Orang ke jai deka manjuk aku, tang aku nadai kala limpang ari ajar Nuan.

¹¹¹Adat Nuan endang nyadika pesaka aku belama iya; sigi amat, sida nyungkak ati aku gaga.

¹¹²Aku mutuska runding deka ngasika adat Nuan belama iya datai ke ujung.

¹¹³Aku begedika orang ke aum-juak, tang aku rinduka adat Nuan.

¹¹⁴Nuan meh penyaga enggau pengelindung aku. Aku manggaika pengandal ati aku ba semaya Nuan.

¹¹⁵Rari ari aku, kita ke ngereja penyai, ngambika aku ngereja utai ti dipesanka Allah Taala aku.

¹¹⁶Beri aku pengering, munyi ti udah disemaya Nuan, ngambika aku idup, lalu anang nejuka aku asa ngapa ke pengadang aku!

¹¹⁷Pegai aku, ngambika aku likun lalu seruran meratika adat Nuan.

¹¹⁸Nuan nulak semua orang ke limpang ari adat Nuan; sigi amat, kelakar sida endang nadai guna.

¹¹⁹Nuan nulak semua orang ke jai baka uras; Nya kebuah aku rinduka adat Nuan.

¹²⁰Tubuh aku getar-getar laban aku nangika Nuan, lalu aku takutka ukum Nuan.

¹²¹Aku udah ngereja utai ti lurus sereta ngena; anang ninggalka aku ba jari orang ke nekanka aku!

¹²²Aku minta Nuan besemayaka nulung nembiak Nuan tu. Anang nejuka orang ke enda nangika Allah Taala nekanka aku!

¹²³Mata aku nyau rapa nganti pengelepas ari Nuan, nganti Nuan ngamatka semaya Nuan.

¹²⁴Ibun meh aku nitihka pengerindu Nuan ti meruan belama iya, lalu ajar aku adat Nuan.

¹²⁵Aku tu nembiak Nuan; asuh aku mereti, ngambika aku nemu adat Nuan.

¹²⁶TUHAN, tu meh maya Nuan patut ngereja utai, laban mensia udah ngelanggar adat Nuan.

¹²⁷Aku rinduka pesan Nuan, lebih agi ari emas, lebih agi ari emas ti pemadu tulin.

¹²⁸Nya alai aku nitihka semua ajar Nuan.[200] Aku begedika semua jalai ti salah.

¹²⁹Adat Nuan endang manah; nya alai aku deka ngasika adat Nuan.

¹³⁰Lebuh jaku Nuan diterangka, iya meri penerang; iya meri penemu ngagai orang ke enda nemu utai.

¹³¹Mulut aku rangap-rangap lalu aku sengah-sengah lelengauka pesan Nuan.

¹³²Kuingka Diri ngagai aku, lalu kasihka aku baka Nuan ke kasihka semua orang ke rinduka Nuan.

¹³³Tegapka singkang aku munyi ti udah disemaya Nuan, lalu anang nejuka penyai ngalahka aku.

¹³⁴Tebus aku ari orang ke nekanka pengidup aku, ngambika aku ulih ngasika ajar Nuan.

¹³⁵Awakka penampak mua Nuan manchar ngagai aku ke nembiak Nuan, lalu ajar aku adat Nuan.

¹³⁶Ai mata aku nyau bekerenjui, laban mensia enda ngasika adat Nuan.

¹³⁷Nuan endang lurus, TUHAN, lalu ukum ti diberi Nuan endang ngena.

¹³⁸Adat ti udah diberi Nuan endang betul sereta ngena.

¹³⁹Aku pedis ati, laban bala munsuh aku enda ingatka ajar Nuan.

¹⁴⁰Semaya Nuan endang tau dikarapka lalu aku rinduka iya!

¹⁴¹Aku tu orang ke nadai guna sereta dikeleseka orang, tang aku enda ngelengkaka ajar Nuan.

¹⁴²Pengelurus Nuan deka tan belama iya lalu adat Nuan endang amat.

¹⁴³Ati aku balat tusah sereta irau, tang pesan Nuan ngasuh ati aku gaga.

¹⁴⁴Adat Nuan endang lurus belama iya. Asuh aku mereti ngambika aku ulih idup.

¹⁴⁵Aku ngangauka Nuan enggau pengabis ati aku; saut aku, O TUHAN! aku besemaya deka ngasika adat Nuan!

¹⁴⁶Aku ngangauka Nuan; selamatka aku, ngambika aku ngasika adat Nuan.

¹⁴⁷Sebedau tumbuh mata panas, aku ngangauka Nuan minta tulung. Aku manggaika pengandal ati aku ba semaya Nuan.

¹⁴⁸Semalam-malam aku enda tinduk, belematika semaya Nuan.

¹⁴⁹Nuan endang rinduka aku belama, nya alai dingaka aku, O TUHAN. Kasihka aku, lalu selamatka aku!

¹⁵⁰Orang ke jai ti deka merinsaka aku, nyau deka datai semak ngagai aku. Sida nya orang ke ngelanggar adat Nuan.

¹⁵¹Tang Nuan endang semak aku, O TUHAN, lalu semua pesan Nuan endang amat magang.

¹⁵²Aku lama udah nemu adat Nuan lalu Nuan ngaga adat Nuan meruan belama iya.

¹⁵³Peda Nuan pemerinsa aku, lalu lepaska aku, laban aku nadai kala limpang ari adat Nuan.

¹⁵⁴Bejaku meh Nuan ngarika aku, lalu tebus aku; Selamatka aku, nitihka semaya Nuan.

¹⁵⁵Orang ke jai enda dilepaska, laban sida enda ngasika adat Nuan.

¹⁵⁶Naka meh pemesai pengasih Nuan, O TUHAN; selamatka aku nitihka pengelurus atur Nuan.

¹⁵⁷Aku mayuh munsuh lalu orang ke nekanka pengidup aku mega mayuh, tang aku nadai kala limpang ari adat Nuan.

¹⁵⁸Lebuh aku merening ngagai orang ke aum-juak, ati aku pedis, laban sida enda nitihka pesan Nuan.

¹⁵⁹Peda Nuan pemalat aku rinduka ajar Nuan. Selamatka aku, laban pengerindu Nuan endang meruan belama iya!

¹⁶⁰Semua adat Nuan endang amat magang, lalu semua adat Nuan endang lurus sereta meruan belama iya.

¹⁶¹Orang ke bekuasa merinsaka aku enggau nadai kebuah, tang aku nangika jaku Nuan.

¹⁶²Aku gaga ati ke semaya Nuan, baka ke tetemuka pengaya.

¹⁶³Aku begedi sereta kejika semua pemula, tang aku rinduka adat Nuan.

¹⁶⁴Tujuh kali aku muji Nuan dalam sehari ketegal pengelurus adat Nuan.

¹⁶⁵Orang ke rinduka adat Nuan diau likun belama; nadai utai ulih ngasuh sida tesangkut.

¹⁶⁶Aku nganti Nuan ngelepaska aku, O TUHAN, lalu aku ngereja utai ti dipesanka Nuan.

¹⁶⁷Aku ngasika adat Nuan. Aku rinduka sida enggau pengabis ati aku.

¹⁶⁸Aku ngasika ajar enggau adat Nuan, laban Nuan meda semua utai ti dikereja aku.

¹⁶⁹Awakka sabak aku datai ba Nuan, O TUHAN; asuh aku mereti, munyi ti udah disemaya Nuan.

¹⁷⁰Pendingka sampi aku, lalu selamatka aku, munyi ti udah disemaya Nuan!

¹⁷¹Aku deka muji Nuan berari, ngambika Nuan ngajar aku adat Nuan.

¹⁷²Aku deka belagu muji jaku Nuan, laban semua pesan Nuan endang lurus magang.

¹⁷³Awakka Nuan seruran sedia nulung aku, laban aku nitihka pesan Nuan.

¹⁷⁴Aku lelengauka pengelepas ari Nuan, O TUHAN, lalu aku gaga ati ke adat Nuan.

¹⁷⁵Awakka aku idup ngambika aku ulih muji Nuan, lalu awakka adat Nuan nulung aku.

¹⁷⁶Aku udah limpang baka bedus ti tesat; giga meh nembiak Nuan, laban aku nadai kala enda ingatka adat Nuan.