Read Iban Masmur 132 Bible Online

Masmur 132 - Iban bible

Masmur 132

¹O TUHAN, anang enda ingatka David, semua pemerinsa ti ditatka iya.

²O TUHAN, kingatka utai ti udah disemaya iya, semaya ti udah digaga iya enggau Nuan, Allah Taala ti Pemadu Bekuasa, ke disembah Jakop:

³“Aku enggai pulai ke rumah, tauka tama ngagai bilik tinduk.

⁴Aku enggai tinduk tauka belelak,

⁵sebedau aku nyendiaka endur alai TUHAN, rumah alai Allah Taala ti Pemadu Bekuasa, ke disembah Jakop, diau.”

⁶ Kami ninga pasal Peti Lampang Batu Adat di Betlehem, lalu kami nemu Peti nya ba padang Jearim.

⁷Ku kami bejaku, “Aram kitai mansang ngagai rumah TUHAN. Aram kitai nyembah Iya di mua kerusi diraja Iya.”

⁸Angkat meh Nuan O TUHAN, lalu mansang ngagai rumah Nuan, sama enggau Peti Lampang Batu Adat, ti ngelambangka kuasa Nuan.

⁹Awakka bala imam Nuan seruran ngerasukka pengelurus, lalu awakka bala nembiak Nuan manjung gaga ati!

¹⁰Ketegal nembiak Nuan David, anang nulak raja ti udah dipilih Nuan.

¹¹ Nuan udah besemaya ngena sumpah enggau David, semaya ti enda tau dibatak Nuan pulai: “Aku deka ngasuh siku ari peturun nuan ti lelaki duduk ba kerusi diraja nuan.”

¹²Enti bala peturun nuan ti lelaki ngasika sempekat enggau adat ti deka diajar Aku ngagai sida, peturun sida ke lelaki deka mega duduk ba kerusi diraja nuan belama iya.”

¹³Laban TUHAN udah milih Sion; Iya deka ngaga Sion nyadi endur alai Iya diau.

¹⁴“Tu meh endur alai Aku deka diau belama iya. Tu meh endur alai Aku diau, laban Aku deka merintah ba endur tu.

¹⁵Aku deka meri semua utai ti dipeguna Sion. Aku deka meri pemakai ti chukup ngagai nembiak iya ke seranta.

¹⁶Bala imam iya deka ngayanka pengelepas ari Aku, lalu bala nembiak iya deka belagu sereta manjung gaga ati.

¹⁷ Ditu Aku deka ngasuh peturun David nyadi raja ti besai kuasa, baka lampu ti menyadi belama iya.

¹⁸Aku deka ngasuh bala munsuh iya malu, tang perintah iya deka nyadi kaya-raja sereta mansang.”