Read Iban Masmur 135 Bible Online

Masmur 135 - Iban bible

Masmur 135

¹Puji TUHAN! Puji meh nama Iya, puji TUHAN, kita ke nembiak Iya,

²ke bediri dalam Rumah TUHAN, dalam Rumah Sembiang Allah Taala kitai.

³Puji meh TUHAN, laban Iya endang badas. Belagu pantun puji ke nama Iya, laban Iya endang nelap.[209]

⁴Iya milih Jakop ke Iya Empu, lalu orang Israel nyadika pesaka Iya.

⁵Laban aku nemu TUHAN endang besai, ari atas semua petara.

⁶Iya ngereja sebarang utai ti dikedekaka Iya di langit enggau di dunya, di tasik enggau di tasik ti dalam.

⁷Iya ngasuh kabut betiup ari tisi langit. Iya ngaga kilat lebuh hari ujan, lalu Iya mansutka ribut ari bilik setor Iya.

⁸Iya udah munuh semua anak tuai di menua Ejip, anak tuai mensia enggau jelu.

⁹Di menua Ejip Iya ngereja kereja ajih enggau kereja ti nyelai kena Iya ngukum raja enggau semua pemesai iya.

¹⁰Iya ngerusak mayuh bengkah bansa lalu munuh mayuh raja ke bekuasa.

¹¹Sihon, raja orang Amor, enggau Og, raja menua Basan, enggau semua raja menua Kanaan.

¹²Iya meri menua sida nyadika pesaka nembiak Iya Israel.

¹³Nama Nuan, O TUHAN, deka meruan belama iya, Semua serak deka ingatka Nuan.

¹⁴Laban TUHAN deka nyaga nembiak Iya, lalu siru enggau sida.

¹⁵ Petara orang bansa bukai digaga ari pirak enggau emas, ditempa jari mensia.

¹⁶Sida bisi lubang nyawa, tang enda ulih bejaku, bisi mata, tang enda ulih meda,

¹⁷bisi pending, tang enda ulih ninga, lalu sida pen enda mega nemu enseput.

¹⁸Awakka semua orang ke ngaga lalu arapka engkeramba nya nyadi baka[210] engkeramba nya empu!

¹⁹Puji meh TUHAN, kita orang Israel. Puji meh Iya, kita peturun Aron!

²⁰Puji meh TUHAN, kita orang Lewi. Puji meh TUHAN, semua kita ke nangika Iya!

²¹Puji meh TUHAN di Sion, Iya ti diau di Jerusalem! Puji TUHAN!