Read Iban Masmur 138 Bible Online

Masmur 138 - Iban bible

Masmur 138

¹[211] Aku meri terima kasih ngagai Nuan, O TUHAN, enggau pengabis ati aku. Aku belagu muji Nuan di mua bala petara.

²Aku meremi ngadap ngagai Rumah Nuan ti kudus, lalu meri terima kasih ngagai nama Nuan ketegal pengerindu enggau penetap ati Nuan ti meruan belama iya, laban Nuan udah mandangka Diri enggau pesan Nuan endang tinggi ari semua.[212]

³Nuan nyaut aku, lebuh aku ngangauka Nuan. Ngena pengering Nuan, Nuan ngeringka aku.

⁴Semua raja di dunya deka muji Nuan, O TUHAN, laban sida udah ninga semaya Nuan,

⁵lalu sida deka belagu ngenang utai ti dikereja Nuan, laban mulia Nuan amat besai.

⁶Laban taja pen Nuan diau tinggi di atas, tang Nuan ngintu orang ke baruh pendiau, lalu orang ke sumbung enda ulih belalai ari Nuan.

⁷Taja pen aku dikelingi penusah, Nuan nyaga nyawa aku; Nuan ngunjurka jari Nuan ngelaban bala munsuh aku lalu jari kanan Nuan ngelepaska aku.

⁸Nuan deka ngamatka semua utai ti udah disemaya Nuan ngagai aku; Pengerindu Nuan endang meruan belama iya, O TUHAN. Anang ninggalka nembiak Nuan Israel.