Read Iban Masmur 139 Bible Online

Masmur 139 - Iban bible

Masmur 139

¹[213] O TUHAN, Nuan udah meresa lalu nemu aku.

²Nuan nemu semua utai ti dikereja aku; Ari jauh Nuan meda semua runding aku.

³Nuan meda aku lebuh aku gawa tauka belelak, lalu Nuan nemu semua utai ti dikereja aku.

⁴Indah sebedau aku bejaku deh Nuan endang udah nemu semua utai ti deka disebut aku.

⁵Nuan endang ngelingi aku, lalu Nuan nyaga aku ngena kuasa Nuan.

⁶Penemu Nuan endang amat dalam, ngelui ari ti ulih diperagam aku.

⁷Kini ke tunga aku ulih ngerarika diri ari Nuan? Ngagai ni aku ulih ngerarika diri ari Nuan?

⁸Enti aku niki ke serega, Nuan ga bisi dia. Enti aku gali di dunya pemati, Nuan ga bisi dia.

⁹Enti aku terebai lalu diau ba endur ti pemadu jauh,

¹⁰Nuan ga bisi dia nguluka aku, lalu jari kanan Nuan nulung aku.

¹¹Enti aku nyebut, “Awakka pemetang ngelamun aku, lalu awakka penampak ti ngelingi aku bebali nyadi malam,”

¹²indah pemetang nya deh enda chukup petang ke Nuan, lalu malam terang baka penampak siang hari; laban ba Nuan pemetang enggau penampak sigi nadai bida.

¹³Laban Nuan udah nempa semua perengka tubuh aku; lalu bejantilka aku dalam kandung indai aku.

¹⁴Aku muji Nuan laban Nuan endang patut dikenangika, laban semua utai ti dikereja Nuan endang nyelai sereta manah magang. Nuan sigi nemu aku.

¹⁵Lebuh tulang aku benung ditempa, dipejantilka bejimat jimat dalam kandung indai aku, lebuh aku benung mansang besai dalam kandung enda dipeda mensia, Nuan nemu aku endang bisi dia.

¹⁶Nuan endang udah meda aku sebedau aku ada. Umur ti diungkup Nuan ke aku endang udah ditulis dalam bup Nuan, sebedau utai nya nyadi.

¹⁷ O Allah Taala, naka meh pemayuh runding Nuan datai ke aku nyau enda teperagamka sida.

¹⁸Enti aku ngitung sida, sida mayuh agi ari igi pasir. Lebuh aku dani, aku agi mengkang enggau Nuan.

¹⁹O Allah Taala, naka meh pemanah enti Nuan munuh orang ke jai! Naka meh pemanah enti orang ke mangah nya jauh ari aku!

²⁰Sida nyakap Nuan. Sida bejaku jai ngelaban nama Nuan.[214]

²¹Naka meh pemalat aku begedika orang ke begedika Nuan, O TUHAN! Naka meh pemalat aku pedis ati ke orang ke angkat ngelaban Nuan!

²²Aku begedika sida enggau pengabis ati aku. Aku ngumbai sida munsuh aku.

²³Peresa meh aku, O Allah Taala, ngambika Nuan nemu ati aku. Uji meh ati aku, ngambika Nuan nemu runding aku.

²⁴Giga meh ulah ti jai dalam aku lalu iring aku niti jalai ti meruan belama iya.[215]