Read Iban Masmur 143 Bible Online

Masmur 143 - Iban bible

Masmur 143

¹[222] O TUHAN, dingaka sampi aku! Laban Nuan endang lurus, nya alai pendingka kangau aku. Ulih penetap ati Nuan, saut meh aku!

² Anang nyara aku ke nembiak Nuan; laban nadai orang ke enda bepenyalah di mua Nuan.

³Bala munsuh aku udah begagaika aku lalu ngalahka aku. Munsuh aku udah nutup aku dalam rumah jil ti petang, lalu aku nyau baka orang ke udah mati dulu kelia.

⁴Nya alai aku lemi semengat. Ati aku balat tusah.

⁵Aku ingatka maya dulu kelia. Aku berundingka semua utai ti udah dikereja Nuan, aku ngingatka semua pengawa Nuan.

⁶Aku ngangkatka jari besampi ngagai Nuan. Baka tanah ti rangkai, baka nya meh semengat aku aus ke Nuan.

⁷Saut meh aku diatu, O TUHAN! Aku nadai pengadang agi. Anang belalai ari aku, enggai ke aku enggau orang nurun ngagai dunya pemati.

⁸Asuh aku genap pagi ngingatka pengerindu Nuan ti meruan belama iya, laban aku manggaika pengarap aku ba Nuan. Aku besampi ngagai Nuan. Tunjukka jalai ti patut ditengah aku.

⁹O TUHAN, aku datai ngagai Nuan, minta Nuan nyaga aku. Selamatka aku ari bala munsuh aku.

¹⁰Nuan endang Allah Taala aku. Ajar aku ngereja utai ti dikedekaka Nuan. Aku minta Nuan manah enggau aku, lalu ngiring aku nengah jalai ti likun.

¹¹Selamatka aku, O TUHAN, munyi ti udah disemaya Nuan. Ulih pemadas Nuan, selamatka aku ari penusah aku!

¹²Ketegal pengerindu Nuan ke aku, bunuh meh bala munsuh aku lalu rusak meh semua orang ke nekanka pengidup aku, laban aku tu nembiak Nuan.