Read Iban Masmur 144 Bible Online

Masmur 144 - Iban bible

Masmur 144

¹[223] Pujika TUHAN ti nyaga aku! Iya matihka aku ngelaban munsuh lalu nyendiaka aku beperang.

²Iya nyadi penyaga enggau pengelepas aku, ti dikarapka aku meri aku pengelikun. Iya ngalahka semua bansa lalu ngasuh aku merintah sida.

³ O TUHAN, sapa mensia alai Nuan deka ibuhka sida? Sapa anak mensia, alai Nuan deka ibuhka sida?

⁴Kami tu baka kesuh seput. Umur kami semina sekejap aja, baka ayuk.

⁵O TUHAN, buka meh langit, lalu nurun. Tegu meh bukit, lalu sida deka berasap.

⁶Asuh kilat nyelar lalu mambarka bala munsuh Nuan. Timbakka laja Nuan, lalu asuh munsuh Nuan rari.

⁷Ulurka jari Nuan ari serega, tarit aku ari ai ti dalam, lalu selamatka aku. Selamatka aku ari kuasa orang bansa bukai,

⁸ti nadai kala madahka utai ti bendar tang bula, lalu ngelanggar sumpah diri.

⁹Aku deka nyanyi lagu ti baru ke Nuan, O Allah Taala. Aku deka nebah belikan, lalu belagu ke Nuan.

¹⁰Nuan ngasuh bala raja menang lalu ngelepaska nembiak Nuan David.

¹¹Selamatka aku ari bala munsuh ke mangah. Selamatka aku ari kuasa orang bansa bukai, ti nadai kala madahka utai ti bendar tang bula lalu ngelanggar sumpah diri.

¹²Awakka bala anak lelaki kami, lebuh sida agi biak nyadi baka utai ti ditanam, ti mansang besai lalu nyadi kering. Awakka bala anak indu kami nyadi baka tiang ti manah gaya ti dikena ngias sukut istana.

¹³Awakka rumah setor kami penuh laban genap macham utai ti udah diketau. Awakka jelu bedus ba tanah kami beranak beribu iku.

¹⁴Awakka sapi kami mayuh anak nadai gugur anak, tauka lenyau. Awakka nadai sabak tusah ati didinga ba sebelah jalai raya kami.

¹⁵Lantang meh bansa ke nerima berekat nya. Lantang meh mensia ti ngaku Allah Taala nyadika TUHAN sida!