Read Iban Masmur 145 Bible Online

Masmur 145 - Iban bible

Masmur 145

¹[224] Aku deka ngemesaika Nuan, O Allah Taala enggau Raja aku. Aku deka meri terima kasih ngagai Nuan belama lama iya.

²Tiap hari aku deka meri terima kasih ngagai Nuan, lalu muji nama Nuan belama lama iya.

³TUHAN endang besai lalu endang patut dipuji. Pemesai kuasa Iya enda ulih diperagam mensia.

⁴Utai ti udah dikereja Nuan deka dipuji genap turun-menurun. Sida deka madahka pasal pemesai pengawa Nuan.

⁵Sida deka bejakuka pasal mulia enggau pemesai kuasa Nuan, lalu aku deka belematika pemadas pengawa Nuan.

⁶Orang deka ngenang pasal pemesai pengawa Nuan, lalu aku deka ngemesaika Nuan.

⁷Sida deka nusui pasal semua pemadas Nuan lalu belaguka pasal penelap Nuan.

⁸TUHAN endang rindu sereta kasih, lubah ringat sereta penuh laban pengerindu ti meruan belama iya.

⁹Iya manah enggau semua orang lalu siru enggau semua utai ti udah digaga Iya.

¹⁰Semua utai ti idup ti udah digaga Nuan, O TUHAN, deka meri terima kasih ngagai Nuan, lalu semua nembiak Nuan deka muji Nuan.

¹¹Sida deka bejakuka pasal mulia diraja Nuan lalu madahka pasal kuasa Nuan,

¹²ngambika semua orang nemu pemesai pengawa Nuan enggau pemesai mulia perintah Nuan.

¹³Perintah Nuan endang meruan belama iya, lalu Nuan nyadi Raja belama iya. TUHAN endang deka ngamatka semaya Iya. Iya endang ngayanka pengasih dalam semua pengawa Iya.

¹⁴Iya nulung orang ke dituntung penusah. Iya ngangkatka orang ke udah rebah.

¹⁵Semua utai ti idup aja manggaika pengadang sida ba Nuan, lalu Nuan meri sida pemakai ba maya ti patut.

¹⁶Nuan meri sida chukup utai datai ke semua utai ti idup nadai suntuk utai.

¹⁷TUHAN endang lurus dalam semua utai ti dikereja Iya, ngayanka pengasih dalam semua pengawa Iya.

¹⁸Iya diau semak sida ke ngangauka Iya, ke ngangauka Iya enggau ati ti bendar.

¹⁹Iya meri utai ti dipeguna orang ke ngemesaika Iya. Iya ninga sabak sida, lalu nyelamatka sida.

²⁰Iya nyaga semua orang ke rinduka Iya, tang Iya deka ngerusak orang ke jai.

²¹Aku deka seruran muji TUHAN. Awakka semua utai ti idup ti udah digaga Iya muji nama Iya ti kudus belama lama iya.