Read Iban Masmur 147 Bible Online

Masmur 147 - Iban bible

Masmur 147

¹Puji TUHAN! Laban kitai endang patut belagu muji Allah Taala kitai; laban Iya endang kasih, lalu kitai endang patut belagu muji Iya.

²TUHAN nirika Jerusalem baru. Iya mai orang ke udah dibuai pulai baru ari menua bukai.

³Iya ngeraika orang ke tusah ati lalu malut telih sida.

⁴Iya ngeletak pemayuh bintang, lalu meri nama ngagai tiap igi bintang nya.

⁵TUHAN kitai endang besai sereta bekuasa. Penalam penemu Iya endang enda ulih disukat.

⁶Iya ngangkatka orang ke baruh ati, tang ngempaska orang ke jai ngagai tanah.

⁷Belagu muji TUHAN. Tebah meh belikan ke Allah Taala kitai.

⁸Iya nganchau mua hari di langit. Iya meri ai ujan ngagai tanah lalu ngasuh rumput tumbuh ba sebelah bukit.

⁹Iya meri pemakai ngagai jelu lalu nupi burung kak ti agi mit lebuh sida ngangau.

¹⁰TUHAN ukai gaga ati ke kuda ti kering, tauka rinduka soldadu ti berani,

¹¹tang rinduka orang ke ngemesaika Iya, orang ke manggaika diri ba pengerindu Iya ti meruan belama iya.

¹²Puji meh TUHAN, O Jerusalem! Puji meh Allah Taala kitai, O Sion!

¹³Iya ngasuh semua pintu nuan tegap. Iya merekatka bala nembiak Nuan.

¹⁴Iya nyaga garis entara menua nuan enggau likun lalu ngasuh kita kenyang makai gandum ti pemadu manah.

¹⁵Iya bejaku ngagai tanah, lalu utai ti disebut Iya nyadi enggau jampat.

¹⁶Iya nganchau seleju baka pua lalu naburka ais baka amau.

¹⁷Iya ngasuh ujan batu labuh baka batu kerangan. Nadai orang ulih natka penyelap ti dikirumka Iya!

¹⁸Udah nya Iya bejaku, lalu batu ais nya lela nyadi ai. Iya lalu ngasuh ribut datai, lalu ai nya rarat.

¹⁹Iya meri pesan ngagai bala nembiak Iya, atur enggau Adat Iya ngagai orang Israel.

²⁰Iya nadai kala ngereja utai nya ke semua bansa bukai. Sida enda nemu Adat Iya. Puji TUHAN!