Read Iban Masmur 148 Bible Online

Masmur 148 - Iban bible

Masmur 148

¹Puji TUHAN! Puji meh TUHAN ti datai ari serega, puji meh Iya ba endur ti pemadu tinggi.

²Puji meh Iya, semua kita ke melikat Iya, semua kita ke bala soldadu serega.

³Puji meh Iya, O kita mata hari enggau bulan. Puji meh Iya, O kita bintang ti manchar.

⁴Puji meh Iya, O langit ti pemadu tinggi, enggau kita ai ti ari atas langit.[225]

⁵Awakka semua sida muji nama TUHAN! Laban lebuh Iya bejaku, sida lalu digaga.

⁶Lalu Iya ngengkahka sida ba endur alai sida ke meruan belama iya; Iya ngengkahka sida ba endur sida ngambika sida meruan dia belama iya.

⁷Puji meh TUHAN O kita ke diau di dunya, bala kita naga tasik, enggau semua tasik,

⁸kilat enggau ujan batu, seleju enggau mua hari, ribut ti deras ti ngasika pesan Iya.

⁹Puji meh Iya, O kita munggu enggau bukit, kayu buah enggau utan,

¹⁰semua jelu ti jinak enggau jelu babas, kita ular enggau burung.

¹¹Puji meh Iya, O kita bala raja enggau semua mensia, bala anak raja enggau semua pemerintah ti bukai,

¹²indu ke biak, enggau orang bujang, orang ke tuai enggau bala anak mit.

¹³Awakka semua sida muji nama TUHAN, laban semina nama Iya aja dikemesaika; laban mulia Iya ari atas dunya enggau serega.

¹⁴Iya meri pengering ngagai nembiak Iya, ngambika sida muji Iya, iya nya orang Israel ke balat dikesayauka Iya. Puji TUHAN!