Read Iban Masmur 16 Bible Online

Masmur 16 - Iban bible

Masmur 16

¹[22] Jaga aku, O Allah Taala. Aku ngarapka Nuan meri aku pengelikun.

²Aku nyebut ngagai TUHAN, “Nuan TUHAN aku. Semua utai ti manah ti dikemisi aku, datai ari Nuan magang.”

³Naka meh pemanah bala nembiak TUHAN ti tetap ati ngagai Iya! Aku bisi amat ati deka begulai enggau sida.

⁴Orang ke nyembah petara bukai, deka ditinggang mayuh macham penusah.[23] Aku enggai enggau sida ngenjuk piring. Aku enggai nyembah petara sida.

⁵Semina Nuan aja, TUHAN, ke dikemisi aku lalu Nuan meri aku semua utai ti dipeguna aku. Pengidup aku ba jari Nuan.

⁶Naka meh pemanah pemeri ti diberi Nuan ngagai aku. Naka meh pemanah sida!

⁷Aku muji TUHAN, laban Iya ngiring aku, lalu lebuh malam hari ati aku empu ngajar aku.

⁸Aku seruran nemu TUHAN bisi enggau aku. Iya semak aku, lalu nadai utai ulih ngelebuka aku.

⁹Nya alai aku meri terima kasih sereta gaga ati, lalu aku berasai likun,

¹⁰ laban Nuan nyaga aku ari kuasa pemati. Aku udah betuaika Nuan enggau ati ti tetap, lalu Nuan enda ninggalka aku di dunya pemati.

¹¹ Nuan nunjukka ngagai aku jalai ti nuju ngagai pengidup. Ati aku gaga laban Nuan bisi enggau aku lalu ati aku lantang belama iya.