Read Iban Masmur 17 Bible Online

Masmur 17 - Iban bible

Masmur 17

¹[24] O TUHAN, pendingka aku ke minta atur ti lurus. Pendingka sabak aku ke minta tulung! Dingaka sampi aku, laban sampi aku endang amat.

²Nuan deka kasihka aku lebuh Nuan ngakim aku, laban Nuan nemu utai ti ngena.

³Nuan nemu ati aku. Nuan udah datai ngagai aku lebuh malam hari. Nuan udah meresa semua ati aku lalu nadai tetemuka pengingin ti jai dalam aku. Aku nadai bejaku jai

⁴baka orang bukai. Aku udah ngasika pesan Nuan lalu enda kasar enggau orang.

⁵Aku endang seruran bejalai niti jalai Nuan lalu nadai kala limpang ari jalai nya.

⁶Aku besampi ngagai Nuan, O Allah Taala, laban Nuan nyaut aku. Nya alai singitka pending Nuan ngagai aku, lalu pendingka jaku aku.

⁷pandangka pengerindu Nuan ti manah, lalu selamatka aku. Lebuh aku ngimbai Nuan, aku likun ari munsuh.

⁸Lindung aku baka Nuan ke nyaga mata Nuan Empu. Lalaika aku di baruh sayap Nuan

⁹ari serang orang ke jai. Munsuh seruran bekelingika aku.

¹⁰Sida nadai penyiru, lalu bejaku sumbung.

¹¹Sida ngelingi aku diatu, di sebarang endur aku bejalai, ngiga peluang kena ngalahka aku.

¹²Sida ngipa aku baka singa, laban sida deka encharikka aku.

¹³Datai meh Nuan TUHAN! Serang meh munsuh aku lalu alahka sida! Selamatka aku ngena pedang Nuan ari jari orang ke jai.

¹⁴Selamatka aku ari orang ke bisi semua utai ti dikedekaka sida. Ukum meh sida ngena pemerinsa ti udah ditaga Nuan ke sida. Awakka ukum nya chukup ke bala anak sida enggau ke bala uchu-ambu sida!

¹⁵Tang aku deka meda Nuan, laban aku nadai ngereja penyalah. Lalu lebuh aku dani, aku deka gaga ati laban Nuan bisi enggau aku.