Read Iban Masmur 18 Bible Online

Masmur 18 - Iban bible

Masmur 18

¹[25] Aku rinduka Nuan, TUHAN ke penyaga aku.

²TUHAN nyadika penyaga aku. Iya nyadi kuta aku ti tegap. Allah Taala aku nyadika penyaga aku, lalu aku likun begulai enggau Iya. Iya ngelindung aku baka terabai. Iya nyaga aku ngambika aku likun.

³Aku ngangauka TUHAN, lalu Iya ngelepaska aku ari jari munsuh aku. Puji TUHAN!

⁴Kuasa pemati bekelingika aku. Kuasa pengerusak ngelamun aku baka umbak.

⁵Kuasa pemati bekelingika aku, lalu pendam nan panjuk kena nyintak aku.

⁶Lebuh aku dituntung penusah, aku ngangauka TUHAN. Aku ngangauka Allah Taala aku. Iya ninga aku dalam rumah Iya. Iya ninga kangau aku.

⁷Udah nya tanah begetar sereta berenyang. Pugu bukit beguyat sereta berenyang, laban Allah Taala ringat.

⁸Asap lalu pansut ari lubang idung Iya, lalu daun api ti nyelar, enggau bara api pansut ari nyawa Iya.

⁹Iya ensiatka langit lalu nurun ngena mua hari ti petang di baruh kaki Iya.

¹⁰Iya laju terebai nepan ba sayap melikat cherub Iya. Iya bejalai ngena sayap ribut.

¹¹Iya nyerayung Diri ngena pemetang. Mua hari ti tebal, ti penuh laban ai, bekelingika Iya.

¹²Ujan batu enggau api ti nyelar pansut ari kilat di mua Iya lalu ngebuska mua hari ti chelum.

¹³Udah nya TUHAN lalu bejaku ari langit munyi guntur, lalu munyi nyawa Iya ti Pemadu Tinggi bisi didinga.[26]

¹⁴Iya nimbakka laja Iya lalu mambarka bala munsuh Iya. Ngena selar kilat, Iya ngasuh sida rari.

¹⁵Buntut tasik ayan, lalu pugu dunya pegari, lebuh Nuan ngerara munsuh Nuan, O TUHAN, lalu merakka nyawa Nuan ngagai sida laban Nuan ringat.

¹⁶TUHAN lalu nyengkau aku ari atas, lalu megai aku. Iya narit aku ari ai ti dalam.

¹⁷Iya ngelepaska aku ari bala munsuh aku ti bekuasa enggau ari semua orang ke begedika aku, laban sida kelalu kering.

¹⁸Lebuh aku dituntung penusah, sida nyerang aku, tang TUHAN nyaga aku.

¹⁹Iya nyaup aku ngerarika diri ari utai ti tau nganu. Iya ngidupka aku laban Iya gaga ati ke aku.

²⁰TUHAN ngupah aku laban aku ngereja utai ti ngena. Iya merekatka aku laban aku nadai penyalah.

²¹Aku udah ngasika adat TUHAN. Aku nadai kala ninggalka Allah Taala aku.

²²Aku udah nitihka semua adat Iya. Aku nadai kala enda ngasika pesan Iya.

²³Iya nemu aku nadai penyalah, nemu aku udah nagang diri ngereja utai ti salah.

²⁴Nya alai Iya ngupah aku, laban aku ngereja utai ti ngena, laban Iya nemu aku nadai penyalah.

²⁵O TUHAN, Nuan endang tetap ati ngagai orang ke tetap ati ngagai Nuan. Nuan badas enggau orang ke pemadu badas.

²⁶Nuan mandangka Diri tuchi ngagai orang ke tuchi, tang Nuan bemunsuh enggau orang ke jai.

²⁷Nuan ngelepaska orang ke baruh ati, tang ngemaruhka orang ke sumbung.

²⁸O TUHAN, Nuan meri aku penampak. Nuan muai pemetang ari aku.

²⁹Nuan meri aku pengering kena aku nyerang munsuh aku enggau kuasa kena aku ngalahka kuta sida.

³⁰Naka meh pemanah utai dikereja Allah Taala! Jaku Iya endang tau dikarapka! Iya baka terabai ke semua orang ke minta diri dijaga Iya.

³¹TUHAN siku aja ti Allah Taala. Allah Taala siku aja ti nyadika kuta kitai.

³²Iya nya meh Allah Taala ti ngasuh aku kering, ke ngasuh jalai aku likun.

³³ Iya ngeringka kaki aku. Iya ngasuh aku likun ba sebelah bukit.

³⁴Iya matihka aku beperang, ngambika aku ulih ngena panah temaga.

³⁵O TUHAN, Nuan nyaga aku lalu ngelepaska aku. Nuan udah ngibun aku, lalu ngaga aku nyadi orang ke tinggi pangkat, lalu kuasa Nuan udah ngasuh aku likun.

³⁶Nuan udah nagang aku kena tangkap, lalu aku nadai kala rebah.

³⁷Aku begagaika munsuh aku, lalu nangkap sida. Aku enda badu ngapa datai ke aku udah ngerusak sida.

³⁸Aku mantap sida, lalu sida enda angkat agi. Sida garing-garing alah di mua aku.

³⁹Nuan ngasuh aku kering beperang lalu ngasuh aku menang ngelaban munsuh aku.

⁴⁰Nuan ngasuh munsuh aku rari ari aku. Aku ngerusak sida ke begedika aku.

⁴¹Sida nyabak minta tulung, tang nadai orang deka ngidupka sida. Sida ngangauka TUHAN, tang Iya enda nyaut.

⁴²Aku nginsarka sida baka amau ti dikebuka ribut. Aku ngindik sida baka luchak ti ba jalai raya.

⁴³Nuan udah ngelepaska aku ari orang ke seruran angkat ngelaban lalu ngasuh aku merintah mayuh bengkah bansa. Orang ke enda dikelala aku diatu udah nyadi nembiak aku.

⁴⁴Orang ari bansa bukai meremi di mua aku. Lebuh sida ninga aku, sida ngasi.

⁴⁵Sida enda berani agi lalu datai getar-getar ari kuta sida.

⁴⁶TUHAN endang idup! Puji meh Iya ke nyaga aku! Tusui pasal pemesai Allah Taala ti ngelepaska aku.

⁴⁷Iya ngasuh aku menang ngelaban munsuh aku. Iya ngalahka semua bansa ti dipegai aku

⁴⁸lalu ngelepaska aku ari bala munsuh aku. O TUHAN, Nuan udah ngasuh aku menang ngelaban munsuh aku lalu nyaga aku ari orang ke mangah.

⁴⁹ Nya alai aku muji Nuan di mua semua bansa. Aku belagu muji Nuan.

⁵⁰Allah Taala ngasuh raja Iya menang. Iya seruran ngayanka pengerindu ti meruan belama iya ngagai orang ke udah dipilih Iya, ngagai David enggau peturun iya belama iya.