Read Iban Masmur 21 Bible Online

Masmur 21 - Iban bible

Masmur 21

¹[31] Raja gaga ati, O TUHAN, laban Nuan udah meri iya pengering. Iya gaga ati laban Nuan udah ngasuh iya menang.

²Nuan udah meri iya utai ti dikinginka iya. Nuan udah nyaut peminta iya.

³Nuan udah datai ngagai iya mai berekat ti besai lalu ngerasukka makota emas ba pala iya.

⁴Iya minta diri idup, lalu Nuan meri iya pengidup, enggau umur ti panjai.

⁵Mulia iya besai laban tulung ari Nuan. Nuan udah ngasuh iya tebilang nama sereta bemulia.

⁶Berekat Nuan meruan enggau iya belama iya, lalu iya gaga ati begulai enggau Nuan.

⁷Raja manggaika pengandal iya ba TUHAN ti Pemadu Bekuasa. Lalu iya deka seruran diau likun laban pengerindu TUHAN endang meruan.

⁸Raja deka nangkap semua munsuh iya. Iya deka nangkap semua orang ke begedika iya.

⁹Lebuh iya pegari, iya deka ngerusak sida baka api. TUHAN deka ringat lalu makai sida, lalu api deka makai sida.

¹⁰Nadai siku ari peturun sida deka idup. Raja deka munuh semua sida.

¹¹Sida ngaga pelan, lalu bepekat ngelaban iya, tang sida deka puntan.

¹²Iya deka nimbakka laja iya ngagai sida lalu ngasuh sida nguing lalu rari.

¹³Kami muji Nuan, O TUHAN, laban pengering Nuan endang amat besai! Kami deka belagu lalu muji kuasa Nuan.