Read Iban Masmur 22 Bible Online

Masmur 22 - Iban bible

Masmur 22

¹[32] Allah Taala aku, O Allah Taala aku, nama kebuah Nuan ninggalka aku? Nama kebuah Nuan jauh ari aku lalu enda nulung aku, enda ninga demuh aku?

²O Allah Taala aku, aku ngangauka Nuan lebuh siang hari, tang Nuan enda nyaut. Aku ngangau lebuh malam hari, tang aku enda ulih belelak.

³Tang Nuan kudus duduk ba kerusi diraja Nuan dipuji orang Israel.

⁴Aki ini kami udah manggaika pengarap sida ba Nuan. Sida udah ngarapka Nuan, lalu Nuan udah ngelepaska sida.

⁵Sida ngangauka Nuan, lalu sida diselamatka. Sida manggaika pengandal sida ba Nuan, lalu sida enda asa ngapa.

⁶Tang aku tu ulat, ukai mensia; dikeleseka orang, dikelanyaika semua orang!

⁷ Semua orang ke meda aku, ketawaka aku magang. Sida enchebirka mulut ngagai aku, lalu ngilikka pala sida.

⁸ Ku sida bejaku, “Panggaika pengarap nuan ba TUHAN; awakka Iya ngelepaska nuan. Awakka Iya nyelamatka nuan ke dikerinduka Iya!”

⁹Nuan ngasuh aku ada enggau likun, lalu lebuh aku agi mit, Nuan ngibun aku likun.

¹⁰Aku udah manggaika diri ba Nuan kenyau ari ada, lalu Nuan endang Allah Taala aku.

¹¹Anang jauh ari aku, laban penusah nyau semak, lalu aku nadai orang nulung.

¹²Bala munsuh ke ngelingi aku nyau baka raban sapi ti lelaki. Semua sida ngelingi aku magang, baka sapi ti lelaki ti mangah di Basan.

¹³Sida nukangka nyawa sida ngagai aku, baka singa ti lapar sereta negung.

¹⁴Pengering aku nyau abis, lenyau baka ai ti siuh ba tanah. Semua tulang aku nyau enda betampung agi. Ati aku baka lilin; iya lela dalam dada aku.

¹⁵Batang rekung aku[33] nyau rangkai baka amau, lalu dilah aku nyau lekat ba kelakanit aku. Nuan ngalika aku malai amau pemati.[34]

¹⁶Bala orang ke jai bekelingika aku. Orang ke ngereja penyai ngelulung aku. Sida nguyaska[35] jari enggau kaki aku.

¹⁷Semua tulang aku nyau ayan magang. Bala munsuh ketawa meda aku.

¹⁸ Sida bedua gari aku entara bala sida, lalu bechabut undi ke serayung aku.

¹⁹O TUHAN, anang jauh ari aku! Datai jampat lalu lepaska aku!

²⁰Selamatka aku ari pedang. Selamatka aku ari raban ukui tu.

²¹Selamatka aku ari raban singa tu. Aku nadai daya agi[36] di mua raban sapi ti siga tu.

²² Aku deka madahka ngagai bala aku utai ti udah dikereja Nuan. Aku deka muji Nuan ba gempuru sida, munyi tu:

²³‘Puji meh TUHAN, kita ke nangika Iya! Kemesaika Iya, kita ke peturun Jakop! Sembah meh Iya, kita orang Israel!

²⁴Iya nadai kala enda ibuhka orang ke seranta tauka nejuka sida kena perinsa. Iya enda ninggalka sida, tang nyaut sida lebuh sida ngangauka Iya.”

²⁵Lebuh orang begempuru, aku deka muji Nuan ketegal utai ti udah dikereja Nuan. Di mua orang ke nyembah Nuan aku deka ngenjuk piring ti udah disemaya aku.

²⁶Orang ke seranta deka makai datai ke kenyang. Orang ke datai ngagai TUHAN, deka muji Iya. Awakka sida nyamai diau belama iya!

²⁷Semua bansa deka ingatka TUHAN. Sida deka nguing ngagai Iya ari serata dunya. Semua bansa deka nyembah Iya.

²⁸TUHAN endang Raja, lalu Iya merintah semua bansa.

²⁹Semua orang ke sumbung di dunya tu deka meremi di mua Iya;[37] semua mensia deka meremi di mua Iya.

³⁰Serak ti dudi deka betuaika Iya. Sida deka bejakuka pasal TUHAN ngagai serak ke nangkanka sida.

³¹Orang ke apin ada, deka dipadahka: ‘TUHAN udah ngelepaska bala nembiak Iya.’