Read Iban Masmur 25 Bible Online

Masmur 25 - Iban bible

Masmur 25

¹[42] O TUHAN, aku besampi ngagai Nuan.

²Aku manggaika pengarap aku ba Nuan, O Allah Taala aku. Anang nejuka aku alah enggai ke aku malu. Anang nejuka munsuh aku ketawaka aku!

³Orang ke manggaika pengarap diri ba Nuan, enda alah, tang orang ke angkat ngelaban Nuan enggau nadai kebuah, deka alah.

⁴Ajar aku jalai Nuan, O TUHAN. Awakka aku nemu jalai Nuan.

⁵Ajar meh aku diau nitihka pemendar Nuan, laban Nuan endang Allah Taala aku, ke ngelepaska aku. Aku endang seruran arapka Nuan.

⁶O TUHAN, kingatka penelap enggau pengerindu Nuan ti meruan belama iya, ti udah diayanka Nuan kenyau ari dulu kelia.

⁷Ampun meh dosa enggau penyalah ti udah dikereja aku lebuh aku agi biak. Kingatka aku, O TUHAN, ulih pengerindu Nuan ti meruan belama iya, enggau ulih pemadas Nuan!

⁸Laban TUHAN endang lurus sereta badas, Iya ngajar orang ke bedosa jalai ti patut ditengah sida.

⁹Iya nguluka orang ke baruh ati nengah jalai ti ngena lalu ngajar sida peneka Iya.

¹⁰Enggau ati ti tetap sereta enggau pengerindu, Iya nguluka semua orang ke nitihka sempekat Iya, sereta ngasika adat Iya.

¹¹Kingatka semaya Nuan, O TUHAN, lalu ampun dosa aku, laban dosa aku mayuh.

¹²Orang ke nangika TUHAN deka belajar ari Iya jalai ti patut ditengah sida.

¹³Sida deka seruran kaya-raja, lalu bala anak sida deka bempu menua tu.

¹⁴TUHAN nyadika pangan orang ke ngasika Iya lalu Iya netapka sempekat Iya baru enggau sida.

¹⁵Aku endang seruran merening ngagai TUHAN, laban Iya deka ngelepaska aku ari panjuk.

¹⁶Malik ngagai aku, O TUHAN, lalu kasihka aku, laban aku seilu-ilu sereta kena perinsa.

¹⁷Buai pengirau ari ati aku lalu bai aku pansut ari semua penusah aku.

¹⁸Peda pemerinsa enggau penusah aku, lalu ampun semua dosa aku.

¹⁹Peda Nuan pemayuh munsuh aku. Peda Nuan pemalat sida begedika aku.

²⁰Jaga aku lalu selamatka aku. Anang ngasuh aku malu laban aku ngenduh ngagai Nuan.

²¹Awakka pemanah enggau pemetul ati aku nyaga aku, laban aku manggaika pengarap aku ba Nuan.

²²Lepaska Israel, O Allah Taala, ari semua penusah sida.