Read Iban Masmur 27 Bible Online

Masmur 27 - Iban bible

Masmur 27

¹[45] TUHAN meh penampak enggau pengelepas aku. Aku enda takut. TUHAN nyadika kuta nyawa aku; nya alai aku enda takut.

²Lebuh orang ke jai ngamuk aku, deka makai aku, iya nya bala munsuh aku, sida deka tesangkut lalu rebah.

³Taja pen semua bala soldadu ngelulung aku, aku enda takut. Taja pen munsuh nyerang aku, aku deka mengkang berani.

⁴Aku udah minta siti utai ari TUHAN, utai ti digiga aku; iya nya, aku minta diri diau dalam rumah TUHAN seumur idup, ngambika aku ulih belematika pemadas TUHAN, lalu betanya ngagai Iya dalam Rumah Sembiang Iya.

⁵Laban Iya deka ngelindung aku lebuh maya tusah. Iya deka ngelalaika aku dalam Rumah Sembiang Iya lalu ngengkahka aku ba bukit batu.

⁶Nya alai aku deka ngalahka munsuh ke ngelulung aku. Enggau panjung gaga ati aku deka ngenjuk piring dalam Rumah Sembiang Iya. Aku deka belagu muji TUHAN.

⁷Dingaka aku, TUHAN, lebuh aku ngangauka Nuan! Kasihka aku, lalu saut meh aku!

⁸Lebuh Nuan nyebut, ‘Datai kitu lalu sembah Aku,’ aku nyaut, ‘Aku deka datai, TUHAN.’

⁹Anang ngelalaika Diri ari aku! Anang ringat ngagai aku. Anang nulak nembiak Nuan. Nuan udah nulung aku. Anang ninggalka aku. Anang ngelengkaka aku, O Allah Taala ti Penebus aku.

¹⁰Apai enggau indai aku nyangka deka ninggalka aku, tang TUHAN deka ngibun aku.

¹¹Ajar meh aku, TUHAN, jalai Nuan, lalu uluka aku nengah jalai ti rata, laban aku mayuh munsuh.

¹²Anang nyerahka aku ngagai munsuh ke nyerang aku ngena pemula enggau jaku emba.

¹³Aku nemu diri deka idup lalu meda pemadas TUHAN dalam pengidup tu.

¹⁴Panggaika pengarap ba TUHAN. Kering sereta berani; Panggaika pengarap ba TUHAN.