Read Iban Masmur 30 Bible Online

Masmur 30 - Iban bible

Masmur 30

¹[50] Aku muji Nuan, O TUHAN, laban Nuan udah ngidupka aku lalu enda nyagi munsuh aku ketawaka aku.

²Aku nyabak minta tulung Nuan, O TUHAN Allah Taala aku, lalu Nuan ngeraika aku.

³Nuan nagang aku mati; lebuh aku mansang ngagai dunya pemati,[51] Nuan ngidupka aku baru.

⁴Belagu muji TUHAN semua kita ke nembiak Iya! Kingatka utai ti udah dikereja Iya ti Kudus, lalu beri terima kasih ngagai Iya!

⁵Iya ringat enda lama, tang pemadas Iya tan seumur idup. Ai mata nyangka lilih lebuh malam hari, tang pengaga datai lebuh pagi hari.

⁶Aku berasai likun, lalu bejaku dalam ati diri, ‘Aku sigi enda ulih dialahka munsuh.’

⁷Nuan udah manah enggau aku, TUHAN. Nuan udah nyaga aku baka kuta ti ba bukit. Tang Nuan ngelalaika Diri ari aku, lalu aku takut.

⁸Aku ngangauka Nuan, O TUHAN. Aku minta Nuan nulung aku,

⁹Nama penguntung Nuan enti aku mati? Nama penguntung Nuan enti aku dibuai ngagai kubur? Kati orang ke mati ulih muji Nuan? Kati sida ulih nusui pasal penetap ati Nuan?

¹⁰Dingaka aku, TUHAN, lalu kasihka aku! Tulung aku, TUHAN!

¹¹Nuan udah ngubah ati aku ti tusah lalu ngasuh aku betanda gaga ati. Nuan udah muai ati aku ti tusah lalu malut aku ngena pengaga.

¹²Nya alai aku enda tau enda bemunyi. Aku deka belagu muji Nuan. O TUHAN, Nuan meh Allah Taala aku. Aku deka meri terima kasih ngagai Nuan belama iya.