Read Iban Masmur 31 Bible Online

Masmur 31 - Iban bible

Masmur 31

¹[52] Aku datai ngagai Nuan, O TUHAN, minta Nuan nyaga aku. Anang nejuka aku alah. Nuan endang Allah Taala ti lurus. Aku besampi minta Nuan ngelepaska aku!

²Dingaka aku, lalu selamatka sida diatu! Awakka aku ngenduh ba Nuan lalu Nuan ngelindung aku, penyaga ke ngelepaska aku.

³Nuan nyadi endur alai aku ngenduh, nyadika penyaga aku. Iring lalu uluka aku, munyi ti udah disemaya Nuan.

⁴Jaga meh aku likun ari panjuk ti udah ditan orang kena sida nyintak aku, laban aku ngenduh ba Nuan.

⁵ Aku nyerahka diri ngagai jari Nuan. Nuan udah nebus aku, O TUHAN, laban Nuan endang Allah Taala ti tetap ati.

⁶Nuan begedika orang ke nyembah engkeramba, tang aku manggaika pengarap aku ba TUHAN.

⁷Aku deka lantang sereta rami gaga ketegal pengerindu Nuan ti meruan belama iya, laban Nuan udah meda pemerinsa aku. Nuan nemu penusah aku.

⁸Nuan nadai kala nyerahka aku ngagai jari munsuh aku. Nuan udah ngemendarka aku bejalai ngagai sebarang endur aku deka.

⁹Kasihka aku, O TUHAN, laban aku dituntung penusah. Mata aku nyau bangkung laban ati aku balat tusah. Aku tu lelak amat.

¹⁰Aku lelak laban ati aku balat tusah, lalu umur aku nyau pandak laban aku udu nyabak. Aku lembut tulang laban semua penusah aku.[53] Indah tulang aku deh nyau lupis.

¹¹Semua munsuh aku, lebih agi orang ke berimbai pendiau enggau aku, kejika aku. Orang ke ngelala aku, takutka aku. Lebuh sida meda aku ba jalai raya, sida rari.

¹²Aku nyau baka orang ke udah mati, ti enda dikingatka orang agi. Aku tu baka periuk ti udah pechah.

¹³Aku ninga mayuh munsuh betelai. Aku dikelingi utai ti balat ngenakut. Sida ngiga chara kena ngelaban aku, bepekat deka munuh aku.

¹⁴Tang aku manggaika pengarap aku ba Nuan, O TUHAN, laban Nuan endang Allah Taala aku.

¹⁵Aku endang seruran diibun Nuan. Selamatka aku ari bala munsuh aku, ari orang ke merinsaka aku.

¹⁶Perening ngagai nembiak Nuan enggau penelap. Selamatka aku laban pengerindu Nuan endang meruan.

¹⁷Aku ngangauka Nuan, O TUHAN. Anang nejuka aku dipechat. Awakka orang ke jai, dipechat. Awakka sida enda bemunyi mansang ngagai dunya pemati.

¹⁸Padamka jaku orang ke bula, semua orang ke sumbung, enggau tinggi ati, ke bejaku enda bebasaka orang ke lurus.

¹⁹Naka meh pemanah utai ti badas ti disimpan Nuan ke orang ke ngemesaika Nuan! Semua orang nemu pemadas Nuan, pasal Nuan ke nyaga enggau likun orang ke manggaika pengarap sida ba Nuan.

²⁰Nuan ngelalaika sida ba endur Nuan Empu lalu ngibun sida likun ari akal orang bukai. Nuan ngelalaika sida ngambika sida likun ari jaku pechat munsuh.

²¹Puji TUHAN! Naka meh pemanah Iya ngayanka pengerindu Iya ke aku lebuh aku dikelulung sereta diserang munsuh!

²²Aku takut, lalu berunding ngumbai Iya udah muai aku ari Iya. Tang Iya ninga sabak aku, lebuh aku ngangauka Iya, minta tulung.

²³Rindu meh kita ke TUHAN, semua kita ke nembiak Iya. TUHAN nyaga orang ke tetap ati, tang ngukum orang ke sumbung nitihka penyumbung sida.

²⁴Seruran kering, seruran berani, semua kita ke andal ati ke TUHAN.