Read Iban Masmur 32 Bible Online

Masmur 32 - Iban bible

Masmur 32

¹[54] Beberekat meh orang lebuh dosa enggau penyalah sida diampun.

²Beberekat meh orang ke enda dikumbai TUHAN bisi penyalah lalu enda nipu orang.

³Lebuh aku enda ngaku dosa aku, aku lelak nyabak sepemanjai hari.

⁴Siang malam Nuan ngukum aku, TUHAN. Aku nyau nadai pengering agi, baka ai ti rangkai laban panas.

⁵Udah nya aku ngaku dosa aku ngagai Nuan, lalu aku enda ngelalaika penyalah diri. Aku ngaku utai nya ngagai Nuan, lalu Nuan ngampun semua dosa aku.

⁶Nya alai semua nembiak Nuan ke taluk ngagai Nuan patut besampi ngagai Nuan lebuh sida dituntung penusah ngambika penusah nya enda datai ba sida.

⁷Nuan nyadi endur alai aku belalai. Nuan deka ngelepaska aku ari penusah. Aku belagu enggau nyawa ti inggar muji pengelepas ti datai ari Nuan, laban Nuan nyaga aku.

⁸Ku TUHAN bejaku, “Aku deka nunjukka jalai ti patut ditengah nuan. Aku deka ngajar sereta meri nuan jaku lalau.

⁹Anang beli baka kuda tauka baka keledai, ti enda tau enda ditarit ngena repik besi enggau tali ba mulut iya ngambika iya deka nurut.

¹⁰Orang ke jai sigi enda tau enda natka pemerinsa, tang orang ke arapka TUHAN deka dijaga ulih pengerindu Iya ti meruan belama iya.

¹¹Lantang sereta rami gaga meh kita ke lurus ketegal utai ti udah dikereja TUHAN. Manjung gaga ati meh kita ke ngasika Iya!