Read Iban Masmur 34 Bible Online

Masmur 34 - Iban bible

Masmur 34

¹[55] Aku deka seruran meri terima kasih ngagai TUHAN. Aku enggai badu muji Iya.

²Aku deka muji Iya ketegal utai ti udah dikereja Iya. Awakka semua orang ke kena tekan, mending lalu gaga ati!

³Aram kitai nusui pemesai kuasa TUHAN. Aram kitai sama sereta muji nama Iya!

⁴Aku besampi ngagai TUHAN, lalu Iya nyaut aku. Iya ngelepaska aku ari semua penakut aku.

⁵Orang ke kena tekan engkadah ngagai Iya, lalu gaga ati. Sida enda asa ngapa.

⁶Orang ke seranta ngangauka Iya, lalu Iya nyaut. Iya ngelepaska sida ari semua penusah sida.

⁷Melikat TUHAN nyaga orang ke ngemesaika TUHAN lalu ngelepaska sida ari utai ti tau nganu sida.

⁸ Awakka kita empu ngasaika pemadas TUHAN. Beberekat meh orang ke nemu pengelikun lebuh sida begulai enggau Iya.

⁹Nangika TUHAN, semua kita ke nembiak Iya, laban orang ke ngasika Iya, nadai kala suntuk utai.

¹⁰Indah singa deh bejalai lapar laban sida nadai pemakai, tang orang ke ngasika TUHAN, nadai suntuk utai.

¹¹Datai kitu, bala kita anak, lalu pendingka aku. Aku deka ngajar kita jalai ngemesaika TUHAN.

¹² Kati kita minta diri nyamai idup? Kati kita minta diri panjai umur lalu lantang diau?

¹³Enti kita dekaka nya, anang bejaku jai lalu anang bula.

¹⁴Lengkaka penyai, lalu kereja utai ti badas. Giga pemaik enggau pengabis ati kita.

¹⁵TUHAN ngemataka orang ke lurus lalu mendingka sabak sida.

¹⁶Tang Iya ngelaban orang ke ngereja penyai, ngambika lebuh sida mati, sida enda dikingatka agi.

¹⁷Orang ke lurus ngangauka TUHAN, lalu TUHAN ninga, lalu Iya ngelepaska sida ari semua penusah sida.

¹⁸TUHAN diau semak orang ke tusah ati lalu ngidupka sida ke nadai agi pengadang.

¹⁹Orang ke badas natka mayuh macham penusah, tang TUHAN ngelepaska sida ari semua penusah nya.

²⁰ TUHAN nyaga sida. Siti pen nadai meh tulang sida patah.

²¹Penyai deka munuh orang ke jai. Orang ke begedika orang ke lurus, deka diukum.

²²TUHAN deka nebus bala nembiak Iya. Nadai siku orang ke ngenduh ngagai TUHAN deka diukum.