Read Iban Masmur 35 Bible Online

Masmur 35 - Iban bible

Masmur 35

¹[56] Laban meh orang ke ngelaban aku, O TUHAN; serang meh orang ke nyerang aku!

²Bai terabai enggau senyata Nuan, lalu tulung aku.

³Kedarka sangkuh enggau kapak perang Nuan ngelaban orang ke begagaika aku. Aku minta Nuan besemaya ngidupka aku.

⁴Awakka orang ke nguji munuh aku alah lalu dipechat! Awakka orang ke bepekat ngelaban aku, nikal sereta charut runding!

⁵Awakka sida baka rumput ti rangkai ti dikebuka ribut, lebuh melikat TUHAN muru sida!

⁶Awakka jalai ti ditengah sida petang sereta lichin, lebuh melikat TUHAN begagaika sida!

⁷Laban sida manjuk aku enggau nadai kebuah, lalu numbak lubang ti dalam kena sida nangkap aku.

⁸Awakka pengerusak ninggang sida lebuh sida enda ngadang. Lalu awakka sida disintak panjuk sida empu lalu dirusak!

⁹Nya baru aku deka gaga ati ke TUHAN, gaga ati laban Iya udah ngelepaska aku.

¹⁰Enggau pengabis ati aku, aku deka nyebut ngagai TUHAN, “Nadai orang ke sebaka enggau Nuan, O TUHAN. Nuan nyaga orang ke lemi, ari orang ke kering, orang ke seranta, ari orang ke nekanka pengidup sida.”

¹¹Orang ke jai besaksi ngelaban aku lalu bedawa ngumbai aku ngereja penyalah ti enda ditemu aku.

¹²Sida malas pemanah aku ngena penyai, lalu ati aku balat tusah.

¹³Tang lebuh sida sakit, aku ngerasukka pekayan ulit. Aku bepasa. Aku besampi ngendukka pala,

¹⁴baka ke besampika pangan tauka menyadi. Aku bejalai nensam laban aku ngulit, baka orang ke ngulitka indai diri.

¹⁵Tang lebuh aku kena laban penusah, semua sida gaga ati, lalu begempuru ngelingi aku, lalu beduan aku. Orang kampar bepaluka aku, lalu majak bepaluka aku.

¹⁶Sida ngeleseka aku enda ngetu-ngetu, lalu sida begerit ngeli meda aku.

¹⁷Ni pengelama Nuan semina merening aja, O TUHAN? Selamatka aku ari serang sida. Selamatka aku ari bala singa tu!

¹⁸Nya baru aku deka meri terima kasih ngagai Nuan lebuh bala nembiak Nuan begempuru. Aku deka muji Nuan di mua semua sida.

¹⁹ Anang nejuka bala munsuh aku, orang ke bula nya, ketawa meda aku alah. Anang nejuka orang ke begedika aku enggau nadai kebuah, tuchum gaga ati meda aku balat tusah.

²⁰Sida nadai nyebut utai ti manah, tang nempaka berita ti bula pasal orang ke rinduka pemaik.

²¹Ku sida manjung bedawaka aku, “Kami bisi meda utai ti udah dikereja nuan!”

²²Tang Nuan, O TUHAN, udah meda nya. Nya alai, anang enda bemunyi, TUHAN. Anang jauh ari aku!

²³Angkat meh Nuan, O TUHAN, lalu jaga aku. Angkat meh Nuan, O Allah Taala aku, lalu bejaku ngarika aku.

²⁴Nuan endang lurus, O TUHAN, nya alai bejaku meh Nuan madahka aku tu nadai penyalah. Anang nejuka munsuh aku ketawaka aku.

²⁵Anang nejuka sida bejaku enggau pangan diri, “Kitai udah muai iya! Nya aja utai ti dikedekaka kitai!”

²⁶Awakka orang ke ketawaka pemerinsa aku alah sereta charut runding. Awakka orang ke ngumbai diri badas agi ari aku, malu sereta dipechat.

²⁷Awakka orang ke ingin deka meda aku dikumbai nadai penyalah, manjung gaga ati, lalu enda ngetu nyebut, “Naka meh pemesai kuasa TUHAN! Iya gaga ati meda nembiak Iya mujur.”

²⁸Nya baru aku deka nusui pasal pengelurus Nuan, lalu muji Nuan sepemanjai hari.