Read Iban Masmur 37 Bible Online

Masmur 37 - Iban bible

Masmur 37

¹[58] Anang tusah ati ketegal orang ke jai. Anang ngining orang ke ngereja penyalah.

²Enda lama da agi sida deka lesap baka rumput, layu baka babas.

³Panggaika pengarap kita ba TUHAN, lalu kereja utai ti badas; nya baru kita deka diau di menua tu, lantang sereta likun.

⁴Gaga ati ke TUHAN, lalu Iya deka meri nuan utai ti dikinginka nuan.

⁵Serahka pengidup nuan ngagai TUHAN. Panggaika pengarap nuan ba Iya, lalu Iya deka nulung nuan.

⁶Iya deka ngasuh pemadas nuan manchar baka penampak, lalu ngasuh pengelurus nuan manchar terang baka penampak tengah hari.

⁷Diau jenuh di mua TUHAN, lalu anti Iya enggau ati ti liat. Anang irau ketegal orang bukai mujur, tauka ketegal orang bejalaika pelan sida ke jai.

⁸Anang ringat, lalu badu agi pedis ati! Anang irau, laban pengirau semina ngujung ngagai penyai.

⁹Laban orang ke jai deka diburu;[59] tang orang ke nganti TUHAN, deka bempu menua tu.

¹⁰Enda lama da agi orang ke jai deka abis; taja pen kita bebendar begigaka sida, tang kita nadai tetemuka sida.

¹¹ Tang orang ke baruh ati deka bempu menua tu lalu diau lantang ngena pengaya sida.

¹²Orang ke jai kerik-kerik ngeli bepekat ngelaban orang ke lurus;

¹³tang TUHAN ketawaka orang ke jai, laban Iya nemu timpuh sida nyau semak.

¹⁴Orang ke jai nyintak pedang, lalu narit panah sida deka munuh orang ke seranta enggau orang ke suntuk, deka munuh orang ke lurus;

¹⁵tang pedang sida deka ngerejang ati sida empu, lalu panah sida deka dipatahka.

¹⁶Manah agi diau lurus lalu bempu utai ti mimit aja, ari ke bempu mayuh pengaya tang nyadi orang ke jai;

¹⁷laban TUHAN deka muai kuasa orang ke jai, tang nyaga orang ke lurus.

¹⁸TUHAN nyaga orang ke nadai penyalah, lalu sida deka bempu menua tu belama iya.

¹⁹Sida enda merinsa lebuh maya ti jai, lalu lebuh lapar pungkang nyadi, sida deka mayuh pemakai.

²⁰Tang orang ke jai deka mati, lalu bala munsuh TUHAN deka nyadi baka bungai babas; Sida deka lesap baka asap.

²¹Orang ke jai nginjau utai, lalu enda mayar utai nya pulai baru, tang orang ke lurus meri enggau ati ti gerah mudah lalu majak meri;

²²laban orang ke diberekatka TUHAN, deka bempu menua tu, tang orang ke disumpah TUHAN, deka diburu[60] ari menua tu.

²³Singkang kitai diiring TUHAN, lebuh Iya gaga ati ke ulah kitai;

²⁴taja pen kitai[61] tesangkut, tang kitai enda rebah, laban TUHAN deka megai jari kitai.

²⁵Lebuh aku agi biak, enggau lebuh aku nyau tuai, aku nadai kala meda orang ke lurus ditinggalka TUHAN, tauka meda bala anak sida nyanda pemakai.

²⁶Sida endang seruran meri orang utai enggau ati ti gerah mudah, lalu nyali utai ngagai orang, lalu bala anak sida nyadika berekat.

²⁷Lengkaka penyai, lalu kereja pemadas; ngambika kita diau di menua tu belama iya,

²⁸laban TUHAN rinduka atur ti lurus; Iya enda ninggalka bala nembiak Iya ke tetap ati ngagai Iya. Orang ke lurus deka dijaga Iya belama iya, tang peturun orang ke jai, deka diburu.[62]

²⁹Orang ke lurus deka bempu menua tu lalu diau ditu belama iya.

³⁰Mulut orang ke lurus mansutka penemu-dalam, lalu dilah sida seruran bejakuka atur ti lurus.

³¹Adat Allah Taala endang meruan dalam ati sida lalu sida enda limpang ari adat nya.

³²Orang ke jai nengkilunka orang ke lurus deka nguji munuh sida,

³³tang TUHAN enggai nyerahka orang ke lurus ngagai jari munsuh sida, tauka nejuka sida diukum lebuh sida kena pechara.

³⁴Anti meh TUHAN, lalu titihka jalai Iya, lalu Iya deka ngangkatka kita, ngambika kita bempu menua tu; kita deka meda orang ke jai nya dirusak.

³⁵Aku bisi udah kala meda orang ke jai nekanka pengidup orang, ngeninggika diri baka kayu sidar ti di menua Lebanon.[63]

³⁶Tang lebuh aku[64] mansa udah lepas nya, sida nadai agi dia; taja pen aku begigaka sida, tang aku nadai tetemuka sida.

³⁷Peratika orang ke nadai penyalah. Peratika orang ke lurus, laban orang ke diau bebaik enggau orang bukai, deka bisi peturun.

³⁸Tang orang ke ngereja penyalah, deka dirusak magang, lalu peturun sida deka diburu.[65]

³⁹TUHAN ngelepaska orang ke lurus lalu nyaga sida lebuh penusah nyadi.

⁴⁰TUHAN nulung sida, lalu ngelepaska sida. Iya ngelepaska sida ari orang ke jai, lalu nyelamatka sida, laban sida belindung ba Iya.