Read Iban Masmur 38 Bible Online

Masmur 38 - Iban bible

Masmur 38

¹[66] O TUHAN, anang ringat lalu anang nganu aku!

²Nuan udah ngemakalka aku ngena laja Nuan. Nuan udah ngerebahka aku.

³Aku pedis laban Nuan ringat ngagai aku. Tubuh aku abis diempa penyakit laban dosa aku.

⁴Aku lemas dilamun bah dosa aku. Dosa aku kelalu berat.

⁵Laban aku udah beli, rumbak aku nyau bau but.

⁶Aku nyau bungkuk, lalu kunduk-kunduk. Aku ngulit sepemanjai hari.

⁷Aku sakit chelap-angat lalu aku nyau deka mati.

⁸Aku balat lelak, sereta nadai daya agi. Ati aku tusah, lalu aku bedemuh laban pedis.

⁹O TUHAN, Nuan nemu utai ti dikinginka aku. Nuan ninga semua demuh aku.

¹⁰Tungkul ati aku ketap-ketap. Aku nadai agi pengering, lalu mata aku nyau kabur.

¹¹Bala pangan aku, enggau orang ke berimbai pendiau enggau aku, enggai datai semak ngagai aku, ketegal rumbak aku. Indah kami sebilik deh enggai datai semak aku.

¹²Orang ke deka munuh aku, nan panjuk kena sida nyintak aku, lalu orang ke deka ngemediska aku, ngemba madahka diri deka ngerusak aku. Sida nadai nemu badu bepekat ngelaban aku.

¹³Aku tu baka orang ke bengal lalu enda ulih ninga, baka orang ke bisu lalu enda ulih bejaku.

¹⁴Aku tu baka orang ke enda nyaut, laban sida enda ulih ninga.

¹⁵Tang aku manggaika pengarap aku ba Nuan, O TUHAN, lalu Nuan, O TUHAN Allah Taala aku, deka nyaut aku.

¹⁶Anang nejuka munsuh aku ketawaka penusah aku. Anang nejuka sida temegah ketegal aku alah!

¹⁷Aku nyau deka rebah lalu tubuh aku seruran pedis.

¹⁸Aku ngaku dosa aku. Dosa aku ngasuh ati aku irau.

¹⁹Bala munsuh aku bepengerai sereta kering. Mayuh orang begedika aku enggau nadai kebuah.

²⁰Orang ke malas pemanah ngena penyai, ngelaban aku ketegal aku nguji ngereja utai ti ngena.

²¹Anang ninggalka aku, O TUHAN. O Allah Taala aku, anang jauh ari aku!

²²Tulung meh aku diatu, O TUHAN ti Penebus aku!