Read Iban Masmur 39 Bible Online

Masmur 39 - Iban bible

Masmur 39

¹[67] Ku aku bejaku, “Aku deka bejimat nyaga ulah diri enggai ke dilah aku mai aku bedosa. Aku enggai nyebut utai lebuh orang ke jai bisi semak aku.”

²Aku enda bemunyi, enda bejaku. Nyebut pasal utai ti manah pen enda. Tang pemerinsa aku semina mansang balat-sebalat,

³lalu ati aku kelalu balat irau. Makin balat agi aku berunding, makin balat agi ga ati aku tusah. Aku nyau enda ulih nagang diri nanya:

⁴“TUHAN, ni pengelama aku agi idup? Kemaya aku mati? Padahka maya seput aku deka abis.”

⁵Naka meh pemandak umur aku diberi Nuan! Ba Nuan, umur aku endang amat pandak. Iya ti bendar, semua utai ti idup nadai lebih ari kesuh ribut,

⁶baka ayuk. Semua utai ti dikereja kami, nadai guna magang. Kami nugungka pengaya, tang enda nemu sapa ti deka bempu utai nya.

⁷Enti pia, nama utai ti patut diadang aku, O TUHAN? Aku manggaika pengandal aku ba Nuan.

⁸Selamatka aku ari semua dosa aku, lalu anang nejuka orang ke beli beduan aku.

⁹Aku enggai agi bemunyi. Aku enggai agi mansutka jaku, laban Nuan Empu ke ngasuh aku merinsa baka tu.

¹⁰Anang agi nganu aku! Aku nyau deka mati dipalu Nuan.

¹¹Nuan ngukum dosa kami ngena jaku anu Nuan, lalu Nuan baka indu gegat, ngerusak utai ti dikerinduka kami. Iya ti bendar, kami tu nadai lebih ari kesuh ribut!

¹²Dingaka sampi aku, O TUHAN, lalu pendingka sabak aku. Datai lalu tulung aku lebuh aku nyabak. Baka semua aki ini aku, Aku tu semina nyadi temuai Nuan enda lama aja.

¹³Awakka aku diau kediri, ngambika aku tau lantang mimit sebedau aku mupuk, lalu nadai agi.