Read Iban Masmur 40 Bible Online

Masmur 40 - Iban bible

Masmur 40

¹[68] Aku nganti TUHAN enggau ati ti liat. Iya nyingitka pending Iya, lalu ninga sabak aku.

²Iya narit aku pansut ari lubang pemati, ari tanah pasir ti tau nginsap lalu munuh. Iya ngengkahka aku ba atas batu lalu nyaga aku.

³Iya ngajar aku nyanyi lagu ti baru, lagu ti dikena muji Allah Taala kitai. Mayuh orang ke meda utai tu deka takut lalu deka manggaika pengarap sida ba TUHAN.

⁴Beberekat meh orang ke manggaika pengarap ba TUHAN, ti enda nyembah engkeramba tauka enggau orang besembahka petara ti pelesu.

⁵Nuan udah ngereja mayuh macham utai ke kami, O TUHAN Allah Taala kami. Nadai orang sebaka enggau Nuan! Nuan udah ngaga mayuh bengkah pelan ti manah ke kami. Aku enda ulih ngenang semua pelan nya, laban pelan nya kelalu mayuh!

⁶ Nuan enda begunaka piring enggau pemeri. Nuan nadai minta jelu ti ditunu segala ba alta tauka minta piring pengampun dosa. Tang Nuan udah meri aku pending kena aku ningaka Nuan

⁷nya alai aku nyaut, “Tu aku. Atur ti diberi Nuan ngagai aku bisi dalam Bup Adat.[69]

⁸Naka meh pengerindu ati aku ngereja peneka Nuan, O Allah Taala aku! Aku nyimpan ajar Nuan dalam ati aku.”

⁹Lebuh semua nembiak Nuan begempuru, O TUHAN, aku madahka berita manah pasal Nuan ke ngelepaska kami. Nuan nemu, aku sigi enggai badu nusui berita nya.

¹⁰Aku nadai kala ngelalaika berita pasal pengelepas dalam ati aku. Aku endang seruran bejakuka pasal penetap ati enggau pengelepas Nuan. Lebuh semua nembiak Nuan begempuru, aku nadai kala enda bejakuka pasal penaluk enggau pengerindu Nuan ti meruan belama iya.

¹¹O TUHAN, aku nemu Nuan enggai badu kasihka aku. Pengerindu enggau penaluk Nuan deka seruran nyaga aku.

¹²Aku dikelulung mayuh macham penusah ti enda ulih diitung! Dosa aku udah tetitihka aku, lalu aku enda ulih meda agi. Sida mayuh agi ari lambar buk ti ba pala aku, lalu aku nyau nadai pemerani agi.

¹³Selamatka aku, O TUHAN! Tulung meh aku enggau naka penyampat!

¹⁴Awakka orang ke nguji munuh aku alah sereta charut runding. Awakka sida ke lantang ati ketegal penusah aku nikal lalu dipechat.

¹⁵Awakka orang ke beduan aku tusah ati alah.

¹⁶Awakka semua orang ke datai ngagai Nuan lantang sereta gaga ati. Awakka semua orang ke meri terima kasih ketegal pengelepas ti diberi Nuan seruran nyebut, “Naka meh pemesai mulia TUHAN!”

¹⁷Aku lemi sereta seranta, O TUHAN, tang Nuan nadai kala enda ingatka aku. Nuan meh nyadi Penebus enggau Allah Taala aku. Datai jampat lalu tulung aku!