Read Iban Masmur 41 Bible Online

Masmur 41 - Iban bible

Masmur 41

¹[70] Beberekat meh orang ke nemu siru enggau orang ke seranta, laban TUHAN deka nulung sida lebuh sida dituntung penusah.

²TUHAN deka nyaga sida lalu ngidupka sida. Iya deka ngasuh sida diau lantang senang di menua Israel. Iya enggai nejuka sida pedis laban munsuh.

³TUHAN deka nulung sida lebuh sida sakit lalu deka ngeraika sida.

⁴Ku aku bejaku, “Aku udah bedosa ngelaban Nuan, O TUHAN. Kasihka aku, lalu geraika aku.”

⁵Bala munsuh aku nyebut utai ti jai pasal aku. Sida keran deka meda aku mati lalu enda dikingatka agi.

⁶Orang ke datai ngabas aku, ukai datai mai ati ti lurus. Sida ngeluluka berita ti jai pasal aku, lalu udah nya bejalai lalu besiburka berita nya di semua endur.

⁷Semua orang ke begedika aku, betelai enggau pangan diri pasal aku, berundingka utai ti pemadu jai pasal[71] aku.

⁸Ku sida, “Iya sakit lalu nyau deka mati. Iya enda ulih angkat agi.”

⁹ Indah pangan rapat aku, iya ke pemadu dikarapka aku, ke saum empa saum suap enggau aku, deh udah nguing ngelaban aku.

¹⁰Kasihka aku, O TUHAN, lalu asuh aku gerai baru, lalu aku deka malas munsuh aku.

¹¹Sida enda ulih menang ngelaban aku, lalu aku deka nemu Nuan gaga ati ke aku.

¹²Nuan deka nulung aku, laban aku ngereja utai ti ngena. Nuan deka mai aku seruran begulai enggau Nuan belama iya.

¹³ Puji meh TUHAN Allah Taala ke disembah orang Israel! Puji meh Iya diatu enggau belama iya! Amin! Amin!