Read Iban Masmur 42 Bible Online

Masmur 42 - Iban bible

Masmur 42

¹[72] Baka rusa ti tetengukka ai sungai ti chelap, baka nya meh aku lelengauka Nuan, O Allah Taala.

²Aku aus ke Nuan, O Allah Taala ti idup. Kemaya aku ulih besembah di mua Nuan?

³Siang malam aku nyabak, lalu semina ai mata aja nyadika pemakai aku. Bala munsuh aku seruran nanya, “Dini alai Allah Taala nuan?”

⁴Ati aku balat tusah lebuh aku ngingatka utai ti udah, lebuh aku bejalai enggau orang ngagai rumah Allah Taala lalu nguluka sida lebuh sida bejalai, bala orang ke lantang ati, ke belagu sereta manjung muji Allah Taala.

⁵Nama kebuah ati aku tusah? Nama kebuah ati aku enda lantang? Aku deka manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku.

⁶Di menua ti udah alai aku dibuai, ati aku balat tusah. Nya alai aku nguingka runding aku ngagai TUHAN. Iya udah ngasuh semengat aku balat sinu. Penyarut inggar ninggang aku baka ai bah, baka ai wung ti belauh labuh ngagai Sungai Jordan ari bukit Hermon enggau ari bukit Misar.

⁸Awakka TUHAN mandangka pengerindu Iya ti enda berubah, lebuh siang hari, ngambika aku bisi pantun malam hari, sampi ti diberi ngagai Allah Taala ti ngidupka aku.

⁹Ngagai Allah Taala ti nyaga aku, aku nyebut, “Nama kebuah Nuan enda ingatka aku? Nama kebuah aku enda tau enda mengkang natka pemerinsa ba jari munsuh ke merinsaka aku?”

¹⁰Ati aku anchur laban jaku pechat sida, lebuh sida majak nanya aku, “Dini alai Allah Taala nuan?”

¹¹Nama kebuah ati aku balat tusah? Nama kebuah ati aku balat enda lantang? Aku manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku.