Read Iban Masmur 43 Bible Online

Masmur 43 - Iban bible

Masmur 43

¹O Allah Taala, awakka Nuan madahka aku nadai penyalah, lalu bejaku ngarika aku ngelaban orang ke jai. Selamatka aku ari orang ke bula sereta jai!

²Nuan nyadika pengelindung aku. Nama kebuah nuan ninggalka aku? Nama kebuah aku enda tau enda mengkang natka pemerinsa ba jari munsuh ti merinsaka aku?

³Asuh penampak enggau pemendar Nuan nguluka aku lalu mai aku pulai baru ngagai Sion, bukit Nuan ti kudus,[73] enggau ngagai Rumah Sembiang Nuan, ti alai Nuan diau.

⁴Nya baru aku deka mansang ngagai alta Nuan, O Allah Taala, ngagai Allah Taala ti penatai pengelantang ati aku. Aku deka nebah belikan aku, lalu belagu muji Nuan, O Allah Taala, Allah Taala aku.

⁵Nama kebuah ati aku balat tusah? Nama kebuah ati aku enda lantang? Aku deka manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku.