Read Iban Masmur 44 Bible Online

Masmur 44 - Iban bible

Masmur 44

¹[74] O Allah Taala, kami udah ninga ngena pending kami empu, lalu bala sida aki ini kami udah nusui ngagai kami, pasal pengawa ti besai ti udah dikereja Nuan lebuh maya sida dulu kelia,

²pasal Nuan ke muru mayuh bengkah bansa orang kapir lalu ngentapka bala nembiak Nuan diau di menua orang nya; pasal Nuan ke ngukum bansa bukai lalu ngasuh bala nembiak Nuan Empu nyadi kaya-raja.

³Bala nembiak Nuan ukai ngalahka menua tu ngena pedang sida. Sida menang ukai laban kuasa sida empu tang laban kuasa enggau pengering Nuan, laban Nuan bisi enggau sida, ti nunjukka Nuan rinduka sida.

⁴Nuan endang Raja enggau Allah Taala aku Nuan ngasuh[75] bala nembiak Nuan menang,

⁵lalu ulih kuasa nama Nuan, kami ngalahka munsuh kami.

⁶Aku enda ngarapka panah aku tauka pedang aku ulih ngidupka aku,

⁷laban Nuan Empu udah ngelepaska kami ari bala munsuh kami lalu ngalahka orang ke begedika kami.

⁸Kami deka seruran muji Nuan lalu meri terima kasih ngagai Nuan belama iya.

⁹Tang diatu Nuan udah nulak kami, lalu nejuka kami alah. Nuan nadai agi bejalai enggau bala soldadu kami.

¹⁰Nuan ngasuh kami rari ari munsuh kami, lalu sida ngerampas reta tengkira kami.

¹¹Nuan nejuka kami dibunuh baka jelu bedus. Nuan ngachirka kami ngagai menua bukai.

¹²Nuan nyual bala nembiak Nuan Empu ngena rega ti murah baka ke nadai rega.[76]

¹³Orang ke berimbai pendiau enggau kami, meda utai ti dikereja Nuan ngagai kami, lalu sida ngelese sereta ketawaka kami.

¹⁴Nuan udah ngaga kami nyadika leka jaku sema ba bansa bukai. Sida ngilikka pala sida ngelanyaika kami.

¹⁵Aku endang seruran dipechat. Aku nyau malu

¹⁶ninga jaku kelese enggau jaku pechat ti disebut munsuh enggau orang ke begedika aku.

¹⁷Semua utai tu udah nyadi ba kami, taja pen kami nadai kala enda ingatka Nuan tauka ngelanggar sempekat ti udah digaga Nuan enggau kami.

¹⁸Kami nadai udah kala enda taluk ngagai Nuan. Kami nadai udah kala enda ngasika pesan Nuan.

¹⁹Tang taja pia, Nuan udah ninggalka kami nadai daya begulai enggau jelu ti siga. Nuan udah ninggalka kami dalam pemetang.

²⁰Enti kami udah badu agi nyembah Allah Taala kami, lalu besampi ngagai petara orang bansa bukai,

²¹Nuan tetap nemu nya, laban Nuan nemu resia runding kami.

²² Tang ketegal Nuan kami seruran dibunuh baka bedus ti deka disayat.

²³Angkat, TUHAN! Nama kebuah Nuan tinduk? Angkat! Anang nulak kami belama iya!

²⁴Nama kebuah Nuan belalai ari kami? Anang enda ingatka pemerinsa enggau penusah kami!

²⁵Kami rebah redak ke tanah. Kami alah lalu gali malai amau.

²⁶Datai lalu tulung kami! Selamatka kami ketegal pengerindu Nuan ti meruan belama iya!