Read Iban Masmur 45 Bible Online

Masmur 45 - Iban bible

Masmur 45

¹[77] Jaku ti manah datai ba ati aku, lebuh aku ngarang pantun tu ke raja. Dilah aku baka pinsil orang ke landik nulis, sedia deka bepantun.

²Nuan tu lelaki ke pemadu sigat, ke seruran nelap bejaku. Allah Taala endang seruran merekatka nuan.

³Tangkin meh pedang nuan, raja ke bekuasa. Nuan bemulia sereta kering.

⁴Tepan meh kuda nuan Raja ketegal pemenang nuan ngambika nyaga pemendar enggau atur ti lurus! Pengering nuan deka ngasuh nuan menang!

⁵Laja nuan tajam, ngebuska tungkul ati bala munsuh nuan. Semua bansa rebah semak kaki nuan.

⁶ Perintah ti udah diberi Allah Taala ngagai nuan[78] deka tan belama lama iya. Nuan merintah nembiak nuan enggau lurus.

⁷Nuan rinduka utai ti ngena, lalu begedika utai ti jai. Nya kebuah Allah Taala, ti Allah Taala nuan, udah milih nuan lalu udah nuang mayuh agi pengelantang ngagai nuan ari ti dituang ngagai raja bukai.

⁸Bau rengut mur, enggau garu mengkang lekat ba gari nuan. Bala orang ke nebah musik merindang nuan di istana ti dilagu enggau gading.

⁹Bala anak indu raja bukai sama begulai enggau bala anak indu nuan; kuin ke bengepan ngena emas ti pemadu manah bediri ari kanan kerusi diraja nuan.

¹⁰Nuan ti deka nyadi bini raja, pendingka utai ti disebut aku: anang agi ingatka bala nembiak nuan enggau kaban belayan nuan.

¹¹Pemajik nuan deka ngasuh raja ingin rinduka nuan. Iya tuan nuan, nya alai nuan enda tau enda ngasika iya.

¹²Orang ari Tire deka mai pemeri ngagai nuan. Orang ke kaya deka nguji ngulihka ati nuan.

¹³Anak indu raja bisi di istana - naka meh pemajik gamal iya! Baju iya digaga ari ubung emas.

¹⁴Bengepan ngena baju ti mayuh chura, iya dibai ngagai raja, dititihka bala indu ke ngiring iya, lalu sida nya mega dibai ngagai raja.

¹⁵Enggau ati ti lantang sereta gaga sida datai lalu tama ngagai istana raja.

¹⁶Nuan, raja aku, deka mayuh anak lelaki ti deka nganti bala aki ini nuan nyadi raja, lalu nuan deka ngasuh sida merintah semua dunya.

¹⁷Pantun aku deka ngasuh Nuan tampak nama belama iya, lalu semua orang deka muji nuan belama lama iya.