Read Iban Masmur 46 Bible Online

Masmur 46 - Iban bible

Masmur 46

¹[79] Allah Taala endang pengelindung enggau pengering kitai, seruran sedia deka nulung lebuh maya penusah.

²Nya alai kitai enda takut, enti sema tanah berenyang lalu bukit labuh ngagai buntut tasik,

³enti sema tasik begelumbang lalu bukit berenyang.

⁴Bisi siti sungai ti mai pengaga ngagai nengeri Allah Taala, ngagai rumah kudus Allah Taala ti Pemadu Tinggi.

⁵Allah Taala diau dalam nengeri nya, lalu nengeri nya enda rusak. Tumu pagi hari Iya nulung nengeri nya.

⁶Semua bansa bukai deka takut, perintah beguyat. Allah Taala deka bejaku munyi guntur, lalu dunya deka lela.

⁷TUHAN ti Pemadu Bekuasa bisi enggau kitai. Allah Taala Jakop ngelindung kitai.

⁸Datai lalu peda utai ti dikereja TUHAN. Peda pemanah utai ti dikereja Iya di dunya.

⁹Iya ngasuh perang badu agi nyadi di serata dunya. Iya matahka panah, ngeredakka sangkuh, lalu nunu terabai.

¹⁰Ku Iya bejaku, “Badu agi beperang; Aku dekaka kita nemu, Aku tu Allah Taala. Aku ditinggika ulih semua bansa, ditinggika di serata dunya!”

¹¹TUHAN ti Pemadu Bekuasa bisi enggau kitai. Allah Taala Jakop ngelindung kitai.