Read Iban Masmur 48 Bible Online

Masmur 48 - Iban bible

Masmur 48

¹[82] TUHAN endang besai lalu patut dipuji dalam nengeri Allah Taala kitai, ba bukit Iya ti kudus.[83]

² Sion, bukit Allah Taala, endang tinggi sereta manah. Nengeri Raja Ti Besai mai pengaga ngagai semua dunya.

³Allah Taala udah nunjukka pengelikun endang bisi ba Iya dalam kuta nengeri nya.

⁴Bala raja begempuru lalu datai nyerang Bukit Sion.

⁵Tang lebuh sida meda nengeri nya, sida tekejut. Sida panik,[84] lalu rari.

⁶Sida takut, sereta tusah ati, baka indu ke radai deka beranak,

⁷baka kapal ti dipangkaka biaubalai.

⁸Kami bisi ninga pasal utai ti udah dikereja Allah Taala, lalu diatu kami udah meda utai nya ba nengeri Allah Taala, TUHAN ti Pemadu Bekuasa. Iya deka ngibun nengeri nya enggau likun belama iya.

⁹Dalam Rumah Sembiang Nuan, O Allah Taala, kami belematika pengerindu Nuan ti meruan belama iya.

¹⁰Nuan dipuji orang di semua endur, lalu penampak nama Nuan ngelekai di serata dunya. Nuan merintah enggau lurus.

¹¹Awakka orang Sion gaga! Awakka orang dalam nengeri di menua Judah rami gaga laban Nuan meri atur ti lurus.

¹²Bejalai meh kita ngelingi Sion lalu itung semua menara iya.

¹³Peratika dinding, lalu peresa kuta, ngambika kita ulih nusui ngagai serak ti nangkanka kita:

¹⁴“Tu meh Allah Taala ti Allah Taala kitai belama lama iya. Iya deka ngiring kitai belama iya.”