Read Iban Masmur 49 Bible Online

Masmur 49 - Iban bible

Masmur 49

¹[85] Dingaka tu, semua kita! Pendingka tu, semua kita di semua endur,

²kita ke besai, enggau ke mit, ke kaya enggau ke seranta.

³Runding aku deka terang. Aku deka nyebut penemu-dalam.

⁴Aku deka mendingka jaku-dalam lalu nerangka reti iya lebuh aku nebah belikan.

⁵Aku enda takut lebuh aku dituntung penusah, lebuh aku dikelulung bala munsuh,

⁶dikelulung orang ke jai, ke bekering ba pengaya lalu temegahka pemayuh pemisi sida.

⁷Kitai sigi enda ulih nebus diri empu. Kitai enda ulih mayar rega nyawa kitai ngagai Allah Taala,

⁸laban bayar nyawa mensia kelalu besai. Utai ti dibayar kitai, sigi nadai kala chukup

⁹kena nagang kitai tama ngagai kubur lalu ngasuh kitai idup belama iya.

¹⁰ Semua orang nemu, orang ke bepenemu-dalam endang mati magang, baka orang ke lap sereta beli. Semua sida bela ninggalka pengaya sida ke peturun sida.

¹¹Kubur[86] sida nyadika rumah sida belama iya. Dia meh endur alai sida deka diau belama iya, taja pen sida suba udah bisi tanah ke diri empu.

¹²Peninggi pangkat kitai enda ulih nagang kitai mati. Kitai deka mati baka jelu.

¹³Peda utai ti nyadi ba orang ke bekering ba diri empu, pengujung orang[87] ti udah puas ati ke pengaya diri,

¹⁴sida diletak mati baka bedus, lalu pemati deka nyadi pengibun sida. Orang ke lurus deka menang ngelaban sida, lebuh tubuh sida deka buruk dalam dunya pemati, jauh ari menua diri empu.[88]

¹⁵Tang Allah Taala deka ngelepaska aku. Iya deka ngelepaska aku ari kuasa pemati.

¹⁶Anang tusah ati lebuh orang nyadi kaya, lebuh pengaya iya nambah-menambah.

¹⁷Iya enda ulih mai utai nya lebuh iya mati. Pengaya iya enda mupuk enggau iya ngagai kubur.

¹⁸Enti sema orang puas ati ke pengidup diri lalu dipuji ketegal iya mujur,

¹⁹iya deka nitihka aki ini iya lebuh iya mati, ngagai pemetang ti meruan belama iya.

²⁰Peninggi pangkat kitai enda ulih nagang kitai mati. Kitai deka mati baka jelu.