Read Iban Masmur 5 Bible Online

Masmur 5 - Iban bible

Masmur 5

¹[6] Pendingka jaku aku, O TUHAN, lalu dingaka demuh aku.

²Dingaka sabak aku, O Allah Taala enggau Raja aku, laban aku besampi ngagai Nuan.

³O TUHAN, lebuh pagi hari Nuan mendingka munyi nyawa aku; Lebuh pagi hari aku nyendiaka piring ke Nuan, lalu nengkila.

⁴Laban Nuan ukai Allah Taala ti rinduka penyai; Penyai sigi enda begulai enggau Nuan.

⁵Nuan enggai meda orang ke sumbung; Nuan begedika semua orang ke ngereja penyai.

⁶Nuan ngerusak semua orang ke bejaku bula; TUHAN begedika orang ke mangah, ke nipu orang.

⁷Tang ketegal pengerindu Nuan ti besai aku deka tama ngagai rumah Nuan. Aku deka nyembah Nuan dalam Rumah Sembiang Nuan ti kudus enggau ati ti nangika Nuan.

⁸Iring meh aku O TUHAN ngena pengelurus Nuan laban aku bisi munsuh; Gaga jalai Nuan lurus di mua aku.

⁹ Laban jaku sida bula magang; Ati sida semina deka ngerusak. Batang rekung sida nya kubur ti telenga, lalu dilah sida semina ngelangkung aja.

¹⁰Ukum meh sida, O Allah Taala. Awakka akal sida ngerusak sida empu. Buai sida laban sida udah ngereja mayuh macham penyalah, laban sida udah angkat ngelaban Nuan.

¹¹Tang awakka semua orang ke ngiga pengelikun dalam Nuan, gaga ati; lalu awakka sida belagu gaga ati; lalu jaga meh sida, ngambika orang ke rinduka nama Nuan deka gaga ati ke Nuan.

¹²Laban Nuan merekatka orang ke lurus, O TUHAN; Nuan mungkur iya ngena pengerindu baka ke mungkur iya ngena terabai.