Read Iban Masmur 50 Bible Online

Masmur 50 - Iban bible

Masmur 50

¹[89] TUHAN Allah Taala ti Pemadu Bekuasa bejaku. Iya ngangauka semua mensia di dunya ari timur nyentuk ke barat.

²Allah Taala manchar ari Sion, nengeri ti pemadu manah gaya.

³Allah Taala kitai datai, tang ukai enda bemunyi. Api ti mau bisi di mua Iya, ribut biaubalai ngelingi Iya.

⁴Iya ngasuh serega enggau dunya nyadika saksi ngemataka Iya ngakim bala nembiak Iya.

⁵Ku Iya bejaku, “Gempuru ngagai Aku bala nembiak Aku ke tetap ati, orang ke udah ngaga sempekat enggau Aku ngena piring.”

⁶Langit madahka Allah Taala endang lurus, madahka Iya endang Hakim.

⁷Pendingka Aku, kita ke nembiak Aku. Aku deka bejaku. Aku deka besaksi ngelaban kita, Israel. Aku tu Allah Taala, ti Allah Taala kita.

⁸Aku ukai nganu kita ketegal piring kita tauka ketegal piring tunu ti selalu dibai kita ngagai Aku.

⁹Aku enda begunaka sapi ti lelaki ari umai kita tauka kambin ari raban jelu kita.

¹⁰Semua jelu di babas endang enggi Aku magang, sama enggau sapi ti ba beribu igi munggu.

¹¹Semua burung di babas, endang enggi Aku magang, sama enggau semua utai ti idup di padang.

¹²“Enti sema Aku lapar, enda meh Aku minta pemakai ari kita, laban dunya, enggau semua utai ti dalam iya, endang enggi Aku magang.

¹³Kati Aku makai isi sapi tauka ngirup darah kambin?

¹⁴Beri sampi terima kasih kita nyadika piring ngagai Allah Taala. Lalu beri ngagai Iya ti Pemadu Bekuasa semua utai ti udah disemaya kita.

¹⁵Kangauka Aku lebuh kita kena laban penusah. Aku deka ngelepaska kita, lalu kita deka muji Aku.”

¹⁶Tang ku Allah Taala bejaku ngagai orang ke jai, “Nama kebuah kita besebutka pesan Aku? Nama kebuah kita berandauka sempekat Aku?

¹⁷Kita enggai ngelakka Aku ngajar kita. Kita nulak pesan Aku.

¹⁸Kita bepangan enggau semua penchuri ke dipeda kita, lalu kita begulai enggau orang ke butang.

¹⁹“Kita endang seruran sedia deka bejaku jai. Kita enda kakang bula.

²⁰Kita sedia deka bedawaka kaban belayan kita empu lalu begigaka penyalah sida.

²¹Kita udah ngereja semua utai nya, lalu Aku enda bejaku seleka, nya alai kita ngumbai Aku baka kita. Tang diatu Aku nganu kita lalu nerangka pekara tu ngagai kita.

²²Pendingka tu, kita ke enggai ibuhka Aku, enggai ke Aku ngerusak kita, lalu nadai orang deka ngidupka kita.

²³Meri terima kasih nya piring ti ngemesaika Aku, lalu Aku tetap deka ngelepaska semua orang ke ngasika Aku.”